Cenazeyê şervanê YPG‘ê Sîpan Cafer (Xwînrij Welat) ê ku di 13’yê Nîsanê de li gundê Baxoz ê Dêra zorê di dema kar û barên paqijkirina herêmê de şehîd bû, ji ber navenda MeclÎsa Malbatên Şehîdan a Hesekê wergirtin û ber bi Goristana Şehîd Dijwar a li gundê Dawidiyê ve bi rê ketin.

Li goristanê merasîm bi deqeya rêzgirtina leşkerî ya ji aliyê şervanên YPG û YPJ‘ê ve destpê kir. Piştre Meclîsa Malbatên Şehîdan şehadeta şervanên QSD‘ê Ehmed El-Huseynî (Mêrxas) û Zekeriya El-Îsa (Jiyan Hesekê) eşkere kir.

Di merasîmê de, rêveberê Meclîsa Malbatên Şehîdan Bengîn Badînî, ji fermandarên YPG‘ê Ezîz Hesekê û bi navê TEV-DEM‘ê Ferhan Dawid axivîn.

Kesên axivîn sersaxî ji malbatên şehîdan re xwestin û gotin, van şervanan ji bo pêkanîna jiyaneke azad û wekhev canê xwe feda kirin, ji bo dilsoziya bi wan re divê destkeftiyên ku bi saya wan hatin bidestxistin werin parastin.

Fermandarê QSD‘ê Ezîz Hesekê soza şopandina rêya şehîdan û pêkanîna armancên wan da.

Dayika şehîd Xwînrij, Gulîstan Efrînê jî axivî û got: "Dema Xwînrij şehîd ket, min soz da ku rûndikan nebarînim, ji ber ku me hêz ji fikr û felsefeya rêberê xwe Ocalan girtiye. Kesên lewaz digirîn, ji ber vê yekê em negirîn, em ê Efrînê rizgar bikin û di şahiyan de rûndikên kêfxweşiyê bibarînin."

Dayika şehîd bi domdarî got: "Dema em dibêjin şehîd namirin, tê wateya ku em xeta wan dişopînin, bila Erdoganê faşîst zanibe ku berxwedana lehengên wan têk naçe û bi dawî nabe. Şehîd Xwînrij ji min re digot; ‘em ê Efrîn rizgar bikin û lê vegerin.’ Ez soz didim ku têkoşînê dewam bikin heta Efrîn rizgar bibe û hêviyên şehîdan pêk werin."

Nasnameyên şehîdan hatin xwendin û radestî malbatên wan hatin kirin.

Cenazeyê şehîd Xwînrij di nava dirûşme û tilîliyên dayikan de hate veşartin.