Li ser banga Partiya Paşerojê ya Sûriyeyê li bajarê Reqayê bi hezaran kes daketin qadan û Sekrettera Giştî ya Partiya Paşerojê ya Sûriyeyê Hevrîn Xelef bi bîr anîn, ku Hevrîn Xelef ji aliyê çeteyên dewleta Tirk ve hate qetilkirin.

Endamên Meclîsa Herêmî, endamên Rêveberiya Jinan a Reqayê, endamên Meclîsa Sivîl a Reqayê û rûspiyên bajêr jî tevlî meşê bûn.

'EM Ê RÊ NEDIN DAGIRKERIYÊ'

Girseya gel ji qada arkujiyê bi wêneyên Hevrîn Xelef û Ferhat Remedan dest bi meşê kirin. Di çalakiyê de pankartên bi nivîsa "Na ji dagirkeriya dewleta Tirk re", "Em dawî li dagirkeriyê bînin, şoreşê biparêzin", "Bi îradeya jinên azad em ê dagirkeriyê têk bibin" hatin hildan.

Di dawiya meşê de li Parka Şehîd Hevrîn Xelef mîtîngek hate lidarxistin û ji Partiya Paşerojê ya Sûriyeyê Rîm El Mûsa daxuyanî da.

Di daxuyaniyê de hate destnîşankirin ku sekretera giştî ya partiyê Hevrîn Xelef di encama kemîna çeteyan de û plana dewleta Tirk a faşîst de hate şehîdxistin û hezkiriyên partiyê û şêniyên Reqayê vê kiryara hovane şermezar dikin. Di berdewama daxuyaniyê de helwestên rêxistinên mirovî û hiqûqî li hemberî doza Hevrîn Xelef hate şermezarkirin û banga darizandina sûcdaran hate kirin.

Di dawiya daxuyaniyê de soza şopandina rêya şehîdan heta avakirina Sûriyeya pirreng, demokratîk û nanavendî hate dayîn.

Çalakî bi berzkirina sloganên şermezarkirina binpêkirinên dewleta Tirk a dagirker û silavkirina têkoşîna şehîd Hevrîn Xelef û Berxwedana Rûmetê bi dawî bû.