Qonaxa dawî ya vê pêngava QSD'ê ku bi navê "Operasyona qedandina terorê" tê meşandin, 10'ê Îlonê dest pê kir. Çeteyên DAÎŞ'ê li çend cihên li ser sînorê Iraq û Sûriyeyê asê mane.

Operasyon li aliyê rojhilat ê Çemê Firatê tê kirin. Li vê derê bajarokên Hecîn, El Şafa, Sûsê û Bahûz hene. Hecîn cihê dawî ye ku di destê çeteyan de maye, lewma gelekî girîng e.

Ecac û bahoza tozê ku gelek caran li herêmê radibe, bandorê li pêşveçûna şervanên QSD'ê û desteka hewayî dike. Çete jî ji vê yekê sûdê werdigirin û hewl didin êrîş bikin.

Çend wêneyên ku ji aliyê nûçegihanên ANF'ê yên li herêmê hatin kişandin, şert û mercên giran ên şer radixin pêş çavan.

Ecacok û babilîsok dike ku mirov nikarin pêşiya xwe bibînin. Ji ber vê yekê porê gelek şervanan di nav tozê de mane û neçar in rûyê xwe binixumînin.

Li gel şert û mercên giran ê şer, şervanek êm dide kevokan.

Şervanên jin û mêr voleybolê dilîzin, çekên xwe paqij dikin, guleyên roketê bi cih dikin û berê xwe didin eniya şer...

Di operasyonê de yekîneyên taybet ên QSD'ê ku rûyê wan nixumandî ye, hene.