Çalakgeran girtina 9 parlamenterên HDP’ê ku hevserokê partiyê jî di nav de ne û siyasetmedarên din ên Kurd protesto kirin, li ber Komîsyona Ewropayê 2 kon danîn.

Di çalakiyê de ku rêxistina HDP’ê ya Ewropayê li dar xist, Parlamenterên HDP’ê yên nû û berê Tuba Hezer, Faysal Sariyildiz, Ertûgrûl Kurkçu, Kemal Aktaş û Ozdal Uçer amade bûn. Her wiha gelek rêxistinên Kurdan destek dan çalakiyê.

Di çalakiyê de ku zextên rejîma AKP’ê hat şermezarkirin, pankart û afîşên li dijî Erdogan hatin rakirin. Çalakgeran ku rahiştibûn wêneyên wekîlên girtî, dirûşmeyên “Qatil Erdogan” berz kirin.

Di çalakiyê de Parlamenterê Ewropayê Mark Demesmaeker jî axivî, êrîşên li ser HDP’ê û Kurdan şermezar kir, avahiya Komîsyona Ewropayê nîşan da û xwest ku li dijî Tirkiyeyê sepanînên aborî û siyasî pêk bîne.

DIVÊ YE XWE ZELAL BIKE

Parlamenterê HDP’ê Ertûgrûl Kurkçu jî axivî, li dijî zextên li ser partiya xwe nerazîbûn nîşan da, peyama berxwedanê da. Kurkçu got; “Em ê li ti derê gelê xwe bi tenê nehêlin.” 

Piştî Kurkçu, Wekîla HDP’ê Tûba Hezer bi Kurdî dest bi axaftina xwe kir, got rejîma AKP’ê li Tirkiyeyê gelê Kurd tine dihesibîne û wiha dirêjî da axaftina xwe; “Erdogan, ti hiqûq û nirxên mirovî nas nake.”

Hezer bal kişand ser hevkariya desthilatdariya AKP’ê û çeteyên mîna DAÎŞ û El Nûsrayê, ji Yekîtiya Ewropayê xwest ku muzakereyên endamtiya Tirkiyeyê rawestînin û got; “Divê YE xwe zelal bike.”

Çalakiya li ber Komîsyona Ewropayê saet 10.00-14.00’an hat lidarxistin. Ev çalakî wê roja Sêşemê jî di heman saetan de bidome. Her wiha, roja Sêşemê wê li Parlamentoya Ewropayê ji hêla HDP’ê civînek çapemeniyê bê lidarxistin.