Pêkanîna rewşa awarte ya li Wanê ku hikûmeta AKP'ê ji 6-7-8'ê Cotmehê û vir ve dimeşîn, dewam dike. Ev polîtîkayên zordar, ji ber hilbijartinan derketin asta herî bilind. Li nava tax û kolanên Wanê polîs, TOMA, panzer digerin. Polîs li nava kolanan bi çekê meşê lidar dixin. Her wiha yekîneyên leşkerî jî di rewşeke amade de tên ragirtin.

TEVGERA ÇEKDARÎ Û BI DESTEKA MAŞÎNÊN ZIRXÎ

Li Wanê duh bi şev di bin navê "Operasyona YDG-H" de 7 kes hatin binçavkirin. Tevî li navenda bajêr û navçeyên wê ti pirsgirêkeke ewlekariyê nîne jî, tevgera polîsan a bi çek û maşînên zirxî, rê li ber nerazîbûna gel dike.

'AKP DIXWAZE KAOSÊ DERXÎNE Û JI VÊ KAOSÊ SERKETINÊ BI DEST BIXE'

Serokê Şaxê Wanê yê Komeleya Hiqûqnasên Mezopotamyayê Umît Dede da xuyakirin ku li Wanê rewşa awarte ya bi fermî nehatiye îlankirin heye û destnîşan kir ku AKP dixwaze beriya hilbijartinê û di roja hilbijartinê de kaosê derxîne û ji vê kaosê jî serketineke siyasî bi dest bixe.

Dede got, "Lê belê hem HDP hem jî girseya gel a destekê dide HDP'ê haya xwe ji vê rewşê heye. Lewma heta niha bi xwînxwarî û sekneke bi rûmet ev plan hemû pûç kirin. Bê şik û guman em bawer in ku HDP û gelên me wê di van rojên dawî de bi heman hestyarî tevbigerin û rê nedin provokasyonan. Her wiha em bang li Serokkomar, rêveber û namzetên partiya desthilatdariyê dikin ku di rojên dawî yên hilbijartinê de dest ji gotinên xwe yên nefretê berdin. Her wiha em bang li rayedarên hikûmetê, Wezîrê Karên Hundir û Waliyê Wanê dikin ku van tedbîrên ewlekariyê yên bê wate kêm bikin ku bandorê li jiyana mirovan nekin."