Hevserokê Giştî yê Partiya Demokratîk a Gelan (HDP) Sezaî Temellî di civîna heftane ya koma partiya xwe de axivî û rojev nirxand.

Temellî bal kişand ser tecrîda li ser Rêberê Gelê Kurd Abdullah Ocalan û got, "Ev tecrîd tecrîdkirina demokrasî û aştiyê ye. Eger mirov pirsa 'bûyerên ku îro diqewimin li ku dest pê kir?' bipirse, bersiv ew e ku 5'ê Nîsana 2015'an li Îmraliyê bi tecrîdê dest pê kir. Tecrîda li Îmraliyê sazûmankirina faşîzmê ye."

Di dewama axaftina xwe de Temellî işaret bi dagirkeriya dewleta Tirk a li Bakurê Sûriyeyê kir û destnîşan kir ku AKP neçareseriyê li Sûriyeyê ferz dike.

Temellî got, "Meseleya Efrînê herî kêm bi qasî meseleya Dûmayê girîng e. Nêzîkatiya we ya li Efrînê û li Dûmayê zîhniyeta we radixe pêş çavan."

Sezaî Temellî her wiha nerazîbûn nîşanî çêkirina santrala nukleerî ya li Akkûyû da û got, "Fîrmaya ku li Akkûyûyê çêdike ew fîrma ye ku Çernobîl çêkiriye."