Parlamenter û namzetê HDP’ê yê Amedê Altan Tan ku li Stockholmê beşdarî şeva piştevaniya bi HDP’ê re bû, got ku ev coşa salonê coşa hilbijartinê ye û mizgîniya aştiyeke nû û Rojhilateke Navîn a nû ye.

Tan da zanîn ku AKP 13 sal berê bi sozên weke avakirina Tirkiyeyek nû, tasfiyekirina Kemalîzmê, rêzdariya li hemberî hemû çand û baweriyan hatiye ser kar û got: “Lê mixabin piştî demekê ji rê derket. Ket rêyek xerab. Ev rêyek xerabe. Ev dîktatorî ye.  Ev rêya xera aştiyê dînamît dike. Binêrin li hundir aştî tine, li derve aştî tine. Li Tirkiyeyê gel li hev bûne dijmin. Ên ji Sultan hez dikin yên li dij Sultan in. Tirkiye bi hemû cîranên xwe re di nav pevçûnê de ye.”

Tan bi lêv kir ku Erdogan rojê 5 saetan diaxive, ji her kesî re gotinan dide serhev, niha jî Qibrisa ku 250 hezar nifûsa wê heye re di pevdiçe û got: “Bersivê nade daxwazên gelê Ereb, Tirk û Kurd. Ji bo ku bi rastî li Tirkiyeyê aştiyek pêk bê, divê Kurd, Tirk, Elewî û Sunnî mafên xwe bigirin. Bi vî awayî wê aştî pêk bê.

Li Sûriyeyê bi giştî 300 hezar kesî jiyana xwe ji dest da, 7 mîlyon kesî koç kir. Erdogan digot; Îna pêş me ez ê biçim Helebê, ez ê li Şamê nimêj bikim. Lê nekaribû turbeya ku 37 kîlometreyî ji wan dûr e biparêzin.  Anî sînorê Tirkiyeyê. Divê teqez pêşî li vê pêşdeçûyîna xerab bê girtin. Ev jî girêdayî derbaskirina bendê ya HDP’ê ye. Piştî HDP bendê derbas bike wê rayeyên Erdogan bi sînor be.

Bi hilbijartinên Hezîranê re yan Tirkiye wê demokratîk bibe, yan jî wê zêdetir otorîter bibe. Ev coşa wisa bidome wê Tirkiye rizgar bibe. Vê biryarê hûn ê bidin. Ger HDP bikeve parlamentoyê wê hevsengiya neyênî berevajî bibe. Wê pergalek nû bê avakirin.  Ez bang li hemû kesê li Swêdê dijîn dikim ku biçin ser sindoqan û piştgiriyê bidin HDP’ê.”