Li gorî nûçeya Ajansa Mezopotamyayê (MA) li ser daxwaza Serdozgeriya Komarê ya Bûrsayê, Dadweriya Înfazê ya 1’emîn a Bûrsayê der barê Rêberê Gelê Kurd Abdullah Ocalan û girtiyên din Hamîlî Yildirim, Omer Hayrî Konar û Veysî Aktaş ku di Girtîgeha Îmraliyê de ne biryareke nû daye. Dadweriyê ji 2’yê Adara 2018’an de biryara qedexekirina serdêran, pêwendiya bi nivîskî û axaftina bi telefonê û parêzeran û sînordarkirina belgeyên parêzeran ên di vî warî de daye. 
 
Di daxwaza Serdozgeriyê de, ji bo 11 cezayên hucreyê yên di navbera salên 2005-2009’an de li Ocalan hatine birîn û biryara desteya dîsîplînê ya der barê 156 rûpel nameyên wî de, wekî hinceta hewldana darbeya 15’ê Tîrmehê û operasyona Efrînê hatiye nîşandan. 
 
DADWERIYA ÎNFAZÊ DAXWAZ QEBÛL KIR 
 
Dadweriya Înfazê ya 1’emîn a Bûrsayê ku di 2’yê Adarê de daxwaza serdozgeriyê qebûl kir, di biryara xwe ev tişt gotin: “Ji ber ku li welatê me Rewşa Awarte û operasyonên li dijî rêxistinên terorî didomin, dibe ku hikumxwarin di weziyeta pêşengê rêxistina terorî yê PKK’ê de ne, ferman û talîmatan bidin rêxistinên terorî. Li gorî usul û qanûna biryara qebûlkirina daxwaza Serdozgeriya Komarê ya Bûrsayê hatiye dayîn.” 
 
PARÊZERÊN OCALAN ÎTIRAZ KIRIN 
 
Li ser vê biryara Dadweriya Înfazê ya 1’emîn a Bûrsayê, parêzerên Ocalan li Dadgeha Cezayê Giran a 1’emîn a Bûrsayê îtiraz kirin. Parêzeran di îtirazê de destnîşan kir ku ev biryar bi her awayî li dijî hiqûqê ye û xwestin ev derhiqûqî ji holê bê rakirin. 
 
Dadgeha Cezayê Giran a 1’emîn a Bûrsayê îtiraza parêzeran red kir. Dadgehê biryara Dadweriya Înfazê ya 1’emîn a Bûrsayê bi vî awayî sererast kir: “Heta 6 mehan qedexekirina qebûlkirina dîdaran, heta 3 mehan sînordarkirina pêwendiya bi nivîskî û hevdîtina bi telefonê re, heta 6 mehan qedexekirina hevdîtina bi parêzeran re û heta 3 mehan sînordarkirina belgeyên wê parêzer bidin.” Dadgeha Cezayê Giran a 1’emîn a Bûrsayê bi vî awayî biryara Dadweriya Înfazê ya 1’emîn a Bûrsayê erê kir.