Li paytexta Yewnanîstan Atînayê, bi merasîmeke 19'ê Mijdarê roja Yekşemê re wê vekirina Peykerê Qirkirina Suryaniyan bê kirin. Bi vî rengî hejmara welatên ji bo Asûrî-Suryanî-Keldanî yên di sala 1915'an de rastî qirkirinê hatin Peykerê Bîrdariyê danîn, derdikeve şeşan.

Beriya niha peykerên qirkirina Suryaniyan li DYA, Rûsya, Ermenîstan, Fransa û Belçîkayê hatibû danîn. Li paytexta Swêd Stockholmê jî ji bo çikandina peyker, amadekarî dewam dikin.

Danîna peykerê qirkirinê ji bo Suryaniyan, ji aliyê Federasyona Suryaniyan a li Yewnanîstanê û Şaredariya Egaleo ve hatibû pêşniyarkirin.

Xebatên peyker ên ev sê sal in dewam dikin, di rojên bihurî de qediyan û peyker ji bo vekirinê hat amadekirin. Merasîma vekirinê ya 19'ê Mijdarê roja Yekşemê ji aliyê Şaredariya Egaleo û Seyfo Centerê ve ê lidarxistin û wê ji welatên cuda zanyar, polîtîkavan, Şaredarê Egaleo, Serokê Seyfo Centerê Sabrî Atman beşdar bibin û biaxivin.

Seyfo Center ku bi lêkolîn û xebatên xwe yên li ser mijara qirkirinê tê naskirin ragihand ku merasîma vekirina peyker wê li Meydana St Spridon a li pêşberî Dêra St. Spridonê saet di 11:00 de bê kirin.