Çalakiya nobedê ku li ber avahiya Konseya Ewropayê ya li bajarê Strasboûrg ê Fransayê pêk tê, ji aliyê komeke ji Tevgera Jinên Elewî û Federasyona Elewî ya Demokratîk (FEDA) ve tê dewamkirin.

Koma FEDA'yê ji roja Yekşemê û vir ve nobedê digire. Kom ji Gonul Tayçîmen, Dûran Sonzamanci û Jînda Denîz pêk tê. Tevî serma û berfa ku ji destpêka hefteye ve didê, çalakger her roj saet navbera 07:30 û 16:30'î li qada çalakiyê daxwaza azadiya Ocalan dikin.

'EM HETA DAWIYÊ PIŞTGIRIYÊ DIDIN BERXWEDANÊ'

Gonul Tayçîmen bi navê komê daxuyanî da û bal kişand ser greva birçîbûnê ya Leyla Guven, a berxwedêrên li Strasboûrgê û gelek qadan. Tayçîmen çalakgerên greva birçîbûnê silav kir û got, "Bi navê Tevgera Jinên Elewî em bi hevala xwe Leyla re ne û heta dawiyê em destekê didin berxwedana wê."

Tayçîmen bi bîr xist, di felsefeya Elewîtiyê de jiyan pîroz e û hêviya xwe ya ji bo serketina grevên birçîbûnê anî ziman.

Tayçîmen ragihand, ew çalakiya xwe carna di hewa sar a -5 pileyî de dewam dikin û got, hişmendiya têkoşîn û berxwedanê van astengî, zor û zehmetiyan ji holê radike.

Endamên FEDA'yê ji Konseya Ewropayê û Komîteya Pêşîgirtina li Êşkenceyê (CPT) xwestin, ji bo bidawîkirina tecrîdkirina Rêberê Gelê Kurd tavilê bi erka xwe rabin û gavan biavêjin.