NAV-DEM'ê daxuyaniyeke nivîskî weşand û bibîr xist, ku ji 15'ê Tîrmehê dema hewldana darbeyê û vir ve, dewleta Tirk bi ti awayî destûrê nade ku malbat û parêzer biçin Girava Îmraliyê û Rêberê Gelê Kurd Abdullah Ocalan bibînin.

Di daxuyaniyê de bal hat kişandin ser fikarên gelê Kurd ên li ser jiyana Rêberê Gelê Kurd Abdullah Ocalan û hat destnîşankirin, ku rewşek ji komploya navneteweyî ya sala 1999'an xeteretir heye.

Di daxuyaniya NAV-DEM'ê de hat gotin, "Roj roja xwedîderketina li Rêberê Gelê Kurd Abdullah Ocalan û avakirina bloka demokrasiyê ye."

Di dewama daxuyaniyê de hat ragihandin, ku li dijî gefên li ser ewlekarî û tenduristiya Ocalan, wê roja 20'ê Tebaxê li bajarên Berlîn, Hambûrg, Dusseldorf, Frankfûrt û Stûttgartê yên Elmanyayê di asta eyaletan de meşên navendî bên lidarxistin û bang li welatparêz, şoreşger, demokrat, humanîter û alîgirên aştiyê hat kirin ku bi xurtî tevlî van çalakiyan bibin.

Cih û dema çalakiyan bi vî rengî ye:

BERLÎN: Saet di 17:00 de wê li U-Bahn Hermanplatz NEUKOLN'ê meş destpê bike û piştre mîtîng were lidarxistin.

DUSSELDORF: Saet di 14:00 de li Friedrich-Ebertstr. a li ber DGB-Haus a li pêşberî Hautpbahnhofê meş destpê bike û piştre mîtîng bê lidarxistin.

STÛTTGART: Saet di 17:00 de li Lautenschlangerstr. wê meş destpê bike, dûre mîtîng pêk were.

FRANKFÛRT: Saet di 16:00 de wê li Kaiserstr. li ber Hauptbahnhofê meş destpê bike, piştre mîtîng were lidarxistin.

HAMBÛRG: Saet di 15:00 de li U-Bahn Osterstrasse 118, 20255 Hamburg meşê destpê bike û dûre mîtîngê bê organîzekirin.