Ji bo hilbijartinên 24'ê Hezîranê tenê çend roj mane. Namzetên HDP'ê zend û bend ba dan û karê xwe yê ji bo hilbijartinê zêde kirin.

Heyeta HDP'ê piştî mîtîngên li navçeyên Pasûr û Licê yên Amedê tevlî mîtîngên li Hênê û Karazê bûn. Şêniyên Hênê heyeta HDP'ê li pêşiya rê bi konvoyê pêşwazî kir. Namzetê HDP'ê yê parlamenteriyê Îmam Taşiçer diyar kir ku ji bo têkçûna zîhniyeta faşîst a AKP-MH'Pê divê HDP ji benda hilbijartinê derbas bibe û got, "Ji bo vê jî lazime her kes dengê xwe bide û xwedî li sindoqan derkeve. Bila gelê me zanibe, em ê teqez bi ser bikevin." Heyeta HDP'ê ki Karazê jî bi coşeke mezin hate pêşwazîkirin. Semra Guzel silav da gel û got, wê 25'ê Hezîranê mîna cejnekê pîroz bikin. Di çalakiyan de ji bo mîtînga mezin a HDP'ê ya 20'ê Hezîranê ya li Amedê banga tevlîbûnê hate kirin.

Li Edeneyê, namzetên HDP'ê yên parlamenteriyê danê sibehê serdana esnafan kirin û ji bo mîtînga îro ya saet 18'an banga tevlîbûnê kirin. Wekî din li taxa Ovayê bi pêşengiya jinan şahiyek hate lidarxistin.

Rêxistina HDP'ê ya Dîlokê li taxa Karayilan a navçeya Şahînbeyê buroya hilbijartinê vekir. Tevî namzetên HDP'ê yên parlamenteriyê, rêveberên bajar û navçeyan û Dayikên Aştiyê tevlî merasîma vekirinê bûn.

Li Rihayê, namzetê parlamenteriyê Nîmetûllah Erdogmûş serdana rayedarên Federasyona Mafên Heywanan a Anatoliyê kir. Erdogmûş piştre bi rêveberên HDP'ê yên bajar û navçeyan li nava malan geriyan.

Rêxistina HDP'ê ya Îzmîrê li navçeyên Bayrakli, Menemen û Bornovayê civînên gel lidar xist.

Li Denîzliyê jî bi beşdariya bi hezaran kesî li navçeya Merkezefendiyê mîtîngek pêk hat. Namzeta HDP'ê ya Denîzliyê Mizgîn Irgat li mîtîngê axivî û diyar kir ku wê bendê hilweşînin û azadî û demokrasiyê bînin Tirkiyeyê.

Bi beşdariya girseya gel û namzetên parlamenteriyê yên Sêrtê li navçeya Misricê mîtîngek girseyî hate lidarxistin.