Meclîsa Şengalê ya li Derveyî destnîşan kir, ku çeteyên Erdogan di bin navê 'pêşmergeyên rojava' de hewl didin li Şengalê fermanê dubare bikin û got, "YBŞ û YJŞ wê çavên xwe li vê negirin."
Meclîsa Şengalê ya li Derveyî Welat (MŞD), li ser êrîşên koma çekdar a PDK'ê ya li Xanesor a Şengalê daxuyaniyeke nivîskî weşand.
Di daxuyaniyê de bal hat kişandin ser serdana Serokê PDK'ê Mesûd Barzanî ya li Enqereyê û hat bibîrxistin, ku piştî vê serdanê êrîşên dewleta Tirk ên li Rojavayê Kurdistanê giran bûn û li Xanesorê êrîşan dest pê kir.
MŞD'ê ragihand, di bin navê 'pêşmergeyên rojava' de PDK û AKP hewl didin destketiyên Êzidiyan binpê bikin, YBŞ û YJŞ'ê qels bikin û got, "Ezidî aştîxwazin. YBŞ û YJŞ aştîxwazin. Naxwazin nakokî derkeve. Lê belê YBŞ û YJŞ wê nehêlin ku ferman dubare bibe."
Di dewama daxuyaniya MŞD'ê de hat gotin, "Ew kesên bi navê 'pêşmergeyên rojava' dixwazin desthilatdar bin û birakujiyê bikin, gumana me hene ku ew çeteyên Erdogan in û hewl didin fermanê dubare bikin."
MŞD'ê da xuyakirin, ku Kurd û tevahiya civaka Êzidî baş dizane bê kê di 3'ê Tebaxa 2014'an de ferman li Şengalê rakirin û bang li hemû Kurdan kir, ku li ber vê hewldana şerê birakujiyê rabin.
MŞD'ê bang li civaka Êzidî jî kir, ku li tevahiya cîhanê di nava seferberiyê e bin û rabin ser piyan.
