Daxuyanî li Bakurê Minbicê ji aliyê Fermandarê Giştî yê Meclîsa Leşkerî ya Cerablûs Abdulsettar El-Cadîrî ve hate xwendin. Meclîsa Leşkerî ya Cerablûsê, dewleta Tirk ji ber helwestên wê yên li dijî gelên Cerablûs û Sûriyeyê û hewldanên dagirkirina Cerablûsê hişyar kir.

El-Cadir destnîşan kir ku eger kiryarên dijminane pêk werin, wê meclîsa wan bêdeng nemîne û ji bo parastina sivîlan û herêmên xwe, ew ê li gorî qanûnên navneteweyî tevbigere. El-Cadir, derbaskirina çeteyên DAIŞ'ê û yên din ên di ser sînorê Cerablûsê de pêk tên jî, wekî hewldanên tarûmarkirina aramî û tifaqa Sûriyeyê nirxand.

Abdulsettar El-Cadir got ku dema bajarê Minbic û gundên wê ku nêzî herêma Cerblusê ne bi alîkariya şervanên QSD’ê hate rizgarkirin, Rêjîma Tirkiyeyê lez da kiryarên xwe yên dijminane û wiha berdewam kir: “Dewleta Tirk komên çekdar ên girêdayî xwe ku çeteyên DIAŞ’ê jî di nav de ne, bi hejmareke mezin tevdigerîne û ew li nuqeteyên sînor bi cih kirine. Ji vê yekê armanca wan ew e ku, aramiya li Sûriyeyê tarûmar bikin. Di demên dawî de kiryarên wan zêde û kûrtir bûn. Ji bo destkeftiyên gelê me têk bibin planên qirêj pêk tînin.”

Di berdewama axaftina xwe de Abdulsettar El-Cadir ragihand ku Tirkiye bi derbaskirina komên çekdar ên terorîst ku girêdayî rêxistina El-Qaîdeyê ne, dixwaze herêmê dagir bike û wiha pê de çû: “Bi riya komên terorist ên girêdayî El-Qaîdeyê ku li Heleb û Minbicê bi serjêkirina zarokan xwe didin nasîn, bi alîkariya yekîneyên taybet ên îstîxbarata Tirkiyeyê û hêzên wan ên li ser xaka Sûriyeyê dixwazin, herêmên Cerablûsê yên xweşik dagir bikin. Ev yek bi riya peymanên di navbera wan û çeteyên DAIŞ’ê ên terorîst de pêk tên.”

Fermandar Abdulsettar El-Cadir got ku Meclîsa Leşkerî ya Cerablûsê dengê xwe li rêjîma Tirkiyeyê dike û wiha dewamî da axaftina xwe: “Em Dewleta Tirk hişyar dikin ku li dijî xaka Sûriyeyê û pêkhateyên wê û bi taybet herêma Cerablûsê kiryarên dijminane pêk nîne. Em eşkere dibêjin ku em ê bêdeng nemînin û em ê bersiva hemû kiryarên dijminane bidin. Em ê gelê xwe li gorî qanûnên navneteweyî biparêzin. Ev welat ji her kesî re nabe meydan. Parastina ewlekariya herêmê erka me ya exlaqî û qanûnî ye. Ev dikeve ser milê civaka wê û gelê we. Ew ê bersiva hemû kesên êrîşkar bidin. Em wan komên çekdar ên li gorî fermana Tirkiyeyê tevdigerin jî hişyar dikin, bila dest ji kiryarên xwe berdin.”

Di dawiya daxuyaniyê de Abdulsettar El-Cadir bang li Koalîsyona Navdewletî ya ku Amerîka serkêşiya wê dike kir ku li gorî sozên xwe yên parastina herêmê ji destwerdana dewleta Tirkiyeyê tevbigerin û li dijî hewldanên destwerdana li ser xaka Sûriyeyê derkevin. Abdulsettar El-Cadir got ku ew ê bersiva hemû êrîşkaran bidin.

Meclîsa Leşkerî ya Cerablûsê û Gundewarên Wê ji tabûrên Firat Cerablûs (Cewadira), Ehrar Cerblus û Tabûrên Siqûr Cerblusê pêk tê.