Li bajarê Toronto yê Kanadayê, bi pêşengiya Meclîsa Gelê Kurd a Demokratîk ji bo azadiya Rêberê Gelê Kurd Abdullah Ocalan kon hat vedan. Kurdan her wiha polîtîkayên Elmanya yên li dijî Kurdan, şermezar kirin.

Gelek kesên duh li ber Konsolosxaneya Elman a li Torontoyê li hev civiyan, polîtîkaya zext û zordariya dewleta Elman a li hemberî gel û siyasetmedarên Kurd şermezar kirin. Di çalakiyê de ji Berlînê hat xwestin, nêzîkatiya xwe ya li hemberî Kurdan biguherîne û ji bo bigihêje ber destê hikûmeta Merkel dosyayek radestî rayedarên Konsolosxaneyê hat kirin.

Piştî vê çalakiya bi qasî 100 kes tevlî bûn û du saetan dewam kir, li pêşiya Parlamenta Ontarîo ji bo azadiya Rêberê Gelê Kurd Abdullah Ocalan kon hat vedan. Kon wê 10 rojan vedayî be.

Çalakgeran li vê derê, broşurek ji 14 rûpelan a li ser tecrîda li ser Ocalan û komkujiyên li Kurdistanê belav kir. Di çalakiyê de ji bo azadiya Ocalan îmze jî tên komkirin. Çalakî wê heta 14'ê Tîrmehê her roj saet di navbera 10:00-18:00 de pêk were.