Gelê ku li sînor bi armanca piştevaniyê li xeta sînor nobetê digirin, zincîra mirovahiyê avakirin û ji bo dengê xwe bigihînin şervanên YPG-YPJ’ê dirûşmên ‘Bijî Berxwedana Kobanê’ û ‘Bijî berxwedana YPG-YPJ’ê’ berz kirin.

Êrîşên çeteyên DAIŞ’ê yên li hemberî Kobanê du meh li pey xwe hiştin, welatiyên li xeta sînor a Pirsûsê nobetê digirin jî îro dîsa bi zincîra mirovahiyê berxwedan sliav kirin. Çalakî li gundê Mehser û Miseynterê pêk hat. Parlametnera HDP’ê ya Mêrdînê Gulser Yildirim tevlî çalakiyên her du gundan jî bû û ji 7 salî heta 70 salî her kes tevlî çalakiyê bû. Welatiyan destê hev girtin û ji bo şehîdên azadî û demokrasiyê deqeyek rêz girtin.

Girseyê bê navber dirûşmên “Bijî Berxwadana Kobanê”, “Bijî Berxwedana YPG/YPJ” û “Şehîd namirin” berzkirin. Her wiha sirûda Ey Ragip hat xwendin û alên PKK û KCK’ê hatin hildan.

ÇALAKIYA NOBETÊ DIDOME

Welatiyan piştî çalakiya zincîra mirovahiyê çalakiya nobetê berdewam kirin. Li aliyê din jî li Kobanê li gel dengê pevçûnan û dûmana bilind dibe, tevgera balafirên şer ên girêdayî hêzên koalîsyonê didome.