Li Parlamenta Ewropayê (PE) wê di 4'ê Hezîranê de konferansek bi serenavê "Krîza Rojhilata Navîn, Îran û Kurd" were lidarxistin. Konferans ji aliyê Koma PE ya Dostaniya Kurdan ve tê lidarxistin û Komîteya Rojhilatê Kurdistanê ya KNK'ê jî destekê dide.

Komîteya Amadekar a Konferansê der barê mijarê de daxuyaniyek da û bal kişand ser girîngiya lidarketina konferansê di demeke ku li Rojhilata Navîn şerekî mîna yê 3. ê cîhanê diqewime, bi Îranê re li ser çekên nukleerî muzakere tê kirin û li hemberî Kurdan û hindikahiyên din zextên giran tên kirin.

Di daxuyaniyê de hat ragihandin ku Îran bi bikaranîna muzakereyên bi hêzên navneteweyî re, li hundir îdam, îşkence û êrîşên xwe zêde kiriye, hewl dide bandora xwe ya li herêmê xurttir bike û hat gotin, "Nûner û dostên gelên Kurd, Ereb, Fars û Azerî yên bi vê konferansê re werin cem hev, wê hewl bidin balê bikişînin ser rastiyên diqewimin.

Di konferansê de, tevî mijarên demokrasî, mafên mirovan û nêzîkatiyên hêzên navneteweyî yên li hemberî Îranê, wê li ser projeyên çareseriyê yên Kurdan û gelên din nîqaş bê meşandin.

Konferans ji bo xweîfadekirin û peydakirina nuqteyên hevpar ên Kurdan û gelên din, platformeke girîng e. Konferansa ku mûxalefeta Îranê û dostên gelê Kurd jî wê tevkariyê lê bikin, di 4'ê Hezîranê roja Pêncşemê saet di navbera 09:00 - 13:0 de wê were lidarxistin.