Li bajarê Lorient yê Fransa û paytexta Danîmarka Kopenhagê Kurdistanî û dostên wan ji bo Efrînê çalakî lidarxistin. Di çalakiyan de êrîşên dagirkeriya dewleta Tirk ên bi ser Efrînê û bêdengbûna li dijî êrîşan hate protesto kirin.

LORIENT

Li bajarê Lorient ê Fransa komek Kurdistanî ji bo balê bikêşin êrîşên bi ser Efrînê kincên spî li xwe kirin û xwe bi deriyê Walîtiya Lorientê zincîrkirin. Di çalakiyê de êrîşên dewleta Tirk û çeteyên wê yên bi ser Efrînê hate şermezarkirin û bi sedan belavok hate belavkirin.

Kurdistanî û dostên wan bi walî re hevdîtin pêk anîn û daxwaz kirin ku hikûmeta Fransa roleke çalaktir bi cih bîne.

Di çalakiyê de bê navber dirûşmeyên ‘Bijî Berxwedana Efrînê’ , ‘Bijî Serok Apo’ û ‘Kujer Erdoğan’ hate berzkirin.

Gel li pêşiya walitiyê bêdengiya welatên rojava şermezar kir û heta navenda bajêr meşiyan.

Girseya gel ragihand ku heya politîkayên qirkirin û dagirkeriyê bi dawî nebîn, wê li qadan bin.

KOPENHAG

Kurdistaniyên ku li Kopenhagê dijîn a ku paytexta Danîmarkayê ye ji bo Efrînê hatin ba hev. Kurdan li pêşiya konsolosxaneya Rûsyayê hatin ba hev û Tirkiye û Rûsya şermezar kirin.

Girse piştre meşiya pêşiya Konsolosxaneya DYA’yê û li vê derê bêdengiya DYA’yê şermezar kir.