Çalakî ji aliyê Navenda Civaka Demokratîk a Kurd li Freîbûrgê ve hat organîzekirin û tevî endamên ANTÎFA û Dîe Lînke nêzî 300 kes beşdar bûn. Girseya gel li ber avahiya dadgehê ya li Holmarktê civiya û ber bi navenda bajêr ve meşiya.

'BILA AKP LI DADGEHA CEZA YA NAVNETEWEYÎ WERE DARIZANDIN'

Li navenda bajêr li ser navê girseyê daxuyaniyek hat dayîn û hat ragihandin ku li Şengalê pêvajoya qirkirinê hînê dewam dike û balh at kişandin ser komkujiya sivîlan a li gundê Zergelê.

Di dewama daxuyaniyê de hat gotin, "Par li Şengalê li hemberî civata me ya Êzidî komkujiyek hat kirin, bi hezaran mirovên me hatin qetilkirin, mirovên me ji cih û warên xwe bûn û jin û zarok hatin revandin. Di nava vê sala bihurî de, li dijî van çeteyên barbar hêzên HPG, YPJ/YPJ û YBŞ'ê berxwedaneke lehengî nîşan dan. Lê belê di serî de Tirkiye gelek welat li hemberî vê çeteya barbar bêdeng man û destek dan çeteyan. Komkujiya beriya çend rojan li Pirsûsê rû da, nîşaneya herî mezin a vê yekê ye. Her wiha operasyonên qirkirina siyasî yên di rojên dawî de li Kurdistanê tên meşandin, êrîşên hewayî yên li hemberî Qendîlê û komkujiya li gundê Zergelê nîşan dane ku kî li cem kê cih digire. Em dixwazin hikûmeta AKP'ê ji ber van komkujî û hevkariya sûc, li dadgeha ceza ya navneteweyî bê darizandin."

Li dû daxuyaniyê girseya gel careke din li Holzmarktê vegeriya û li vê derê ji bo bîranîna mirovên di komkujiyê de jiyana xwe ji dest dan deqeyek rêz girt. Piştî xwendina Sirûda Çerxa Şoreşê girseya gel belav bû.