Kurdistaniyên li Ewropayê dijîn, çalakiyên xwe yên ji bo şermezarkirina êrîşên dewleta Tirk ên li ser Efrînê didomînin.

HÎLDESHEÎM: Partiya Çep a Elman Dîe Lînke ji bo destekê bide Efrînê li bajarê Hîldesheîm ê Elmanyayê mîtîngek li dar xist. Endamên Dîe Lînke li ber dêra Jakobî li hev civiyan û Navenda Civaka Demokratîk a Kurd jî destek da wan. Rîta Kruger li mîtîngê axivî û got, "Gelê Efrînê bi tenê nîne." Parlamenterê Federal ê Dîe Lînke Dr. Jorg-Dîether Wîlhelm Dehm-Desoî jî got, "Ev çalakî ne tenê ji bo Kurdan e. Li dijî DAÎŞ'ê tabûrên jin şer dikirin û hê jî şer dikin. Niha jî Erdogan ê ku bi DAÎŞ'ê re bazariyeke qirêj kir û nivîskarên me xist girtîgehê, êrîş dike. Divê navê PKK'ê ji nava 'lîsteya rêxistinên terorê' were derxistin. Dijminê me DAÎŞ û Erdogan e. Ew terorîst in. PKK terorîst nîne." Dehm bang li gelê Elmanyayê kir û got, "Di vê kêliyê de li Efrînê jin, zarok, extiyar tên kuştin. Wan li dijî DAÎŞ'ê ji bo azadî, nirxên mirovahiyê û mafên jinan şer kirin. Ev têkoşîn her wiha têkoşîna Elmanan e. Dagirkeriya Erdogan a li Efrînê bisekinînin û bikin ku çekên Elman ji Kurdistanê bên vekişandin." Dehm destnîşan kir ku Kurd ji bo demokrasiyê têdikoşin û ew bi taybetî heyranê Rêberê Gelê Kurd Abdullah Ocalan e.

BERLÎN: Ji bo piştevaniya Berxwedana Serdemê, çalakiyên li paytexta Elmanya Berlînê dewam dikin. Di roja sêyemîn a çalakiya konê berxwedana Efrînê de ku li ber avahiya Parlamenta Federal tê lidarxistin, belavokên bi zimanên Elmanî û Îngilîzî hatin belavkirin.

KOLN: Bi pêşengiya Meclîsa Malbatên Şehîdan (KOMAW) li Breslaûerplatz a bajarê Koln ê Elmanyayê mîtîngek hate lidarxistin. Di mîtîngê de pankarta bi Elmanî ya bi nivîsa "Li Efrînê mirovahî tê parastin" hate hildan. Li vir axaftin hate kirin û ji bo meşa 10'ê Sibatê roja Şemiyê ya li Kolnê banga tevlîbûnê hate kirin.

MUNCHEN: Kurdistanî û dostên wan ên li bajarê Munchen ê Elmanyayê dijîn, li Marîenplatzê konê agahdarkirinê vedan. Çalakî wê çar rojan bidome. Di çalakiyê de dirûşmên "Bijî berxwedana Efrînê", "Artêşa Tirk ji Efrînê bicehime", "Bê Serok jiyan nabe" û "Elmanya destekê dide, Tirkiye bombeyan dibarîne" hatin qîrîn.

HANNOVER: Li bajarê Hannover ê Elmanyayê bi banga KOMAW'ê, Navenda Civaka Demokratîk a Kurd û Meclîsa Jinê ya Ronahî meş û mîtîngek li dijî êrîşên dewleta Tirk hatin lidarxistin. Parlamenterê berê yê BDP'ê Ozdal Uçer jî li vir axivî û rewşa siyasî nirxand.

HAMBÛRG: Yek ji bajarên Elmanyayê ku her roj çalakî lê tê lidarxistin Hambûrg e. Navnîşana çalakiya vê carê, ber Konsolosxaneya Tirk bû. Komên şoreşger ên Tirkiyeyî û komên Elman ên Otonom jî piştgirî dan mîtînga Kurdistaniyan. Li vir daxuyanî hate dayin û hat ragihandin ku li dijî dagirkeriya dewleta Tirk, Kurdên li çar parçeyan li hev civiyane, lewma Erdogan wê ti carî bi ser nekeve.

MANNHEÎM: Li bajarê Mannheîm ê Elmanyayê, 'Platforma Êdî Bes e' çalakiyek organîze kir û êrîşên dagirkeriyê yên dewleta Tirk şermezar kir. Di çalakiyê de belavokên bi zimanê Elmanî hatin belavkirin û saziyên dost jî peyam dan.

BREMEN: Bi pêşengiya KOMAW'ê li ber avahiya Parlamenta Eyaleta Bremenê ya Elmanyayê mîtîngek ji bo Efrînê hate lidarxistin. Di mîtîngê de ku saetekê dewam kir belavokên bi Kurdî û Elmanî hatin xwendin. Çalakgeran bal kişandin ser helwest durû ya dewletên Ewropayê li pêşberî êrîşên Erdogan û ji bo mîtînga 10'ê Sibatê û meşa dirêj a 14'ê Sibatê banga tevlîbûnê kirin.

PARÎS: Li paytexta Fransa Parîsê ku bi rojane çalakî tê lidarxistin, duh jî Kurdistanî û dostên wan ji bo xwedî li Efrînê derkevin li ber avahiya parlamentê li hev civiyan. Di çalakiyê de li ser komkujiyên li Efrînê li sivîlan tên kirin belavok hatin belavkirin û bang li dewleta Fransayê hate kirin ku li dijî êrîşan helwestê nîşan bide.

MARÎGNAN: Kurdistaniyên li bajarê Marîgnan ê Fransayê dijîn bi pêşengiya Ciwanên Azad bi meşaleyan û alên YPG/YPJ'ê meşiyan. Di meşê de pankartên bi nivîsa "Kujer Erdogan" ên bi Fransî, Îngilîzî û Kurdî hatin hilgirtin. Bi navê Ciwanên Azad daxuyaniyek li vir hate dayin û hat gotin, "Her fîşek û bombeya li Efrînê tê teqandin sonda me ya ji bo tolhildanê mezin dike. Em ê li her cihê lê ne hesabê vê bipirsin."

ZURÎCH: Li bajarê Zurîch ê Swîsreyê Kurdistanî û dostên wan li ber gara trenê ya navendî li hev civiyan û berxwedana Efrînê silav kirin. Di çalakiyê de êrîşên dewleta Tirk hatin şermezarkirin û di vê der barê de belavok hatin belavkirin.

DELEMONT: Kurdistanî û dostên wan ên li bajarê Delemont ê Swîsreyê dijîn, ji bo êrîşên dewleta Tirk ên li ser Efrînê şermezar bikin name ji gelek saziyan re şandin. Her wiha li ber strasyona trenê ya navendî li hev civiyan û bi qîrîna dirûşmên "Terorîst Tirkiye", "Kujer Erdogan" dewleta Tirk şermezar kirin. Name û dosyayên li ser Efrînê ji Parlamenta Ewropa, Konseya Mafên Mirovan a Neteweyên Yekbûyî, ÛNÎCEF, Sefaretxaneya Bilind a Rûsyayê û Parlamenta Kanton Jûra re hatin şandin.

FRÎBOÛRG: Li bajarê Frîboûrg ê Swîsreyê bi pêşengiya Ciwanên Azad û Jinên Ciwan ên Azad, meşeke bi meşaleyan hate lidarxistin. Bi qasî 150 ciwan ji ber strasyona trenê ya navendî yeta Place Georges-Python meşiyan.