Parlamentera HDP'ê ya Mêrsînê Fatma Kûrtûlan a li Bazarcixê ku erdhej bû sedema wêraniyeke mezin ji ANF'ê re axivî û got, "Em dizanin ku li gelek cihan di erdhejê de ji pozê mirovan xwîn jî nehatiye. Pisporên li Tirkiyeyê hişyariyê didin, tedbîrên lezgîn tên xwestin. Lê aqil û mantiq cuda bixebitin; Ji ber ku sîstemeke rêveberî ya li hember jiyana mirovan a baldar tune ye, tişta ku divê bê kirin, nayê kirin, tê paşguhkirin."

Kûrtûlan got, "Me li Meclisê di dema erdheja Xarpêtê de xwest tedbîr bên girtin û avahî li ber çavan bê derbas kirin” û wiha dewam kir:

"Pîşesaziya înşaetê ya li Tirkiyeyê bê kontrol e. Em dipirsin pereyê ku ji bo erdhejê hatiye komkirin bi ku ve diçe, lê bersiv nayê dayîn. Ji ber ku rêveberî ne li ser esasê parastina jiyan û ewlehiya mirovan e, desthilatdarî bi zanebûn van tedbîran nagire. Ji roja ewil heta niha wek HDP’ê em li dijî vê têdikoşin. Di nava têkoşînê de her kes hêzeke mezin pêşkêş dike. Hem dildar hem jî alîkariya gel li vir heye, lê dewlet tine ye. Welatî bi xwe jî dibêjin 'Me dewlet li vir nedît'. Dema em hatin, em çûn Dîlokê jî. Li wir eger du-sê polîs û endamên AFAD’ê hebin jî, ew hejmar nedikarî mirovan ji bin kavilan de derînin. Eger mirovên sax mabin jî, ji sermayê jiyana xwe ji dest dan. Li ber avahiyên hilweşiyane, me tenê nalîna mirovan bihîst. Xebata rizgarkirinê tune ye û dewlet bi tevî saziyên xwe nehat vir. Erdhej sibê zû pêk hat û her kes di xew de bû. Lê ev dewlet bi rojan e, hêj nekarî stargeh ji bo welatiyan peyda bike. Welatî hêj li ber sermê ne. Derfeta germkirinê neda mirovan. Dîsa şaredariya HDP'ê yekemîn şorba germ belav kir. Bi hevgirtina Kurdistanî û dostên wan ên li herêmên din re gel bi alîkariyên ku tên vir li ber xwe didin. Vê dewletê nikarîbû ji bo welatiyên xwe av û nan peyda bike.

'LI ŞÛNA BIRÎNA WELATIYAN BIPÊÇIN, BI KUŞTIN Û ÊŞKENCÊ MIJÛL DIBIN'

Em welatekî ku bi fermaneke reş dihatin rêvebirin bûn; em xwedî welatekî bê hesab û bê hiqûq bûn. Dewletê digot, 'Hiqûq û edalet wê li pey me were.’ Ji xwe em wisa bûn. Niha jî ev pergala tarî didome. Welatiyek bi êşkenceyê hat qetilkirin. Li şûna birîna welatiyên xwe bipêçe, dîsa welatî qetil dike. Li holê pergalek wiha heye.”

Parlamentera HDPê Fatma Kûrtûlan di berdewamiyê de wiha got:

"Bi karesatê re ev pergala tarî bi awayekî hîn bêperwa xwe nîşan dide. Piştî erdhejê çima Rewşa Awarte bê îlankirin? Hêj di derdê qedexeyan de ne. Li şûna fikara 'ez çawa dikarim welatiyan ji binê kavilan rizgar bikim', li pey astengkirina çapemeniyê, astengkirina me, qedexeya ragihandinê, bêdengkirina mûxalîfan û li pey kesên rastiyê di medyaya civakî de parve dike, ketiye. Di demek wiha de polîs bi ser malan de digirin û ji welatiyan re dibêjin ‘divê hûn bên îfade bidin.’ Pergalek rezîl e.”