Li Elmanya, Belçîka, Fransa û Swîsreyê, Navendên Civaka Demokratîk ên Kurd (NCDK) û Meclîsên Gel kongreyên xwe pêk anîn.

DRESDEN

Li bajarê Dresden ê Elmanyayê, Navenda Civaka Demokratîk a Kurd kongreya xwe pêk anî. Piştî deqeyeke rêzgirtinê ji bo bîranîna cangoriyên têkoşîna azadiyê, dîwana ji 3 kesan ahte hilbijartin. Delegeyan rewşa dawî ya siyasî nirxandin û destnîşankirin, ku ji bo şikandina tecrîda li ser Rêberê Gelê Kurd Abdullah Ocalan divê bersiveke xurt ji berxwedana niha ya li girtîgehan re bê dayîn.

Piştî xwendin û nirxandina rapora karê salekê, 9 komîsyonên meclîsê hatin hilbijartin. Kerem Gok û Menekşe Uruk Ozer ji bo hevserokatiyê hatin hilbijartin.

Kongre bi qîrîna dirûşma "Bijî Serok Apo" qediya.

BRUKSEL

Li paytexta Belçîka Brukselê, Navenda Civaka Demokratîk a Kurd kongreya xwe lidar xist. Li dû deqeyeke rêzgirtinê, endamê KCDK-E Cîhan Garzan peyivî û diyar kir, lazim e gelê Kurd xwe ji bo pêvajoyeke nû û zehmet a têkoşînê re amade bike.

Di kongreyê de li ser rapora karê salekê nîqaş hate kirin û di dawiyê de 40 endamên meclîsê û hevserok hatin hilbijartin.

Kongre bi qîrîna dirûşma "Bijî Serok Apo" qediya.

MARSÎLYA

Navenda Civaka Demokratîk a Kurd a li bajarê Marsîlya yê Fransayê jî kongreya xwe pêk anî. Kongre bi beşdariya 200 delegeyan bi deqeyeke rêzgirtinê dest pê kir.

Delegeyan rewşa dawî ya siyasî nirxandin û piştre li ser rapora karê salekê nîqaş kirin. Di dawiyê de jî tevî komîsyonan ji bo Hevserokatiyê Arzû Kara û Fethî Korûkçû hatin hilbijartin.

AVÎGNON

Li bajarê Avîgnon ê Fransayê komun hate ragihandin.

Piştî deqeyeke rêzgirtinê siyasetmedarê Kurd Bişar Serhad rewşa dawî ya siyasî nirxand û dûre raporên li ser ewşa malî û pratîkî yên komeleyê hatin xwendin.

Ji bo rêxistinbûna komunê jî hilbijartin hate kirin û Erol Baysûngûr û Fatoş Uncucan ji bo hevserokatiyê hatin hilbijartin. Her wiha komîsyonên ji 25 kesan jî hate avakirin. Hevseroka CDK-F Cemîl Renklîçayir di dawiya kongreyê de axivî û kongre bi qîrîna dirûşma "Bijî Serok Apo" qediya.

LOZAN

Li bajarê Lozan ê Swîsreyê, Navenda Civaka Demokratîk a Kurd (NCDK) kongreya xwe ya salane bi beşdariy 100 endam û mêvanan pêk anî.

Piştî nirxandina rewşa siyasî û karê salekê yê navendê, komîsyon hatin avakirin û meclîsa ji 50 kesî hate hilbijartin. Derya Çelîk û Ogûz Tokar jî ji bo Hevserokatiyê hatin hilbijartin.

Kongre bi stranên Koma Dengê Rojava qediya.