Kurdên li bajarê Çelyabînskê yê Federasyona Rûsyayê, ji bo şermezarkirina komploya navneteweyî ya 15'ê Sibatê li hev civiyan.

Kurd li ber Avahiya Çandê ya Çelyabînskê li hev civiyan û komplo û hêzên komploger şermezar kirin.

Di çalakiyê de ku ji aliyê Meclîsa Gel a Çelyabînskê ve hate organîzekirin, endamê Meclîsa Gel Feyatê Ûsiv axivî. Ûsiv bal kişand ser grevên birçîbûnê yên li dijî tecrîdkirina Ocalan ku zêdeyî sê meh in dewam dikin û got, "Beriya her tiştî em çalakiya wan silav dikin û piştgiriyê didin wan. Dewleta Tirk bi piştgiriya ji hêzên navneteweyî werdigire, di asta komkujiyê de êrîşî Kurdan dike. Ji bo êrîş û tecrîd bi dawî bibin, divê Kurd xwe bispêrin hêza xwe."

Endama Meclîsa Jinan Lêna Tîtal piştre axivî û got, herî zêde divê jinên Kurd xwedî li Rêberê Gelê Kurd Abdullah Ocalan derkevin. Tîtal wiha dewam kir: "Bi saya Ocalan jinên Kurd navê xwe li dîrokê nivîsandin" û anî ziman ku ew bi berxwedana Leyal Guven serbilind in.  Lêna Tîtal diyar kir ku jinên Kurd divê hîn bi rengekî çalak cihê xwe di nava têkoşînê de bigirin û bi geşkirina têkoşîna hevpar komployê têk bibin.