Li Stenbolê di pêşengiya Platforma 25’ê Mijdarê de bi hezaran jinên herikîn kolanan li hemberî zilam, dewlet û DAIŞ’ê ji Tunel heta Qada Galatasaray meşiyan.

Bi hezaran jin di 25’ê Mijdarê Roja Têkoşîna li dijî Tundiya li hember Jinê tevî baranê jî jiTunel heta Galatasaray meşiyan. Jinan ji zilam, dewlet û çeteyên DAIŞ re gotin bes e. Jinan li hember tundiya zilam ku ala îsyanê mor bilind kirin, diyar kirin ku wê li hemberî pergala baviksalar, kapîtalîst û paşverû serî netewînin.

Di meşê de wêneyên Arîn Mîrxan û Kader Ortakaya ku hatin hilgirtin, pankarta “Em li hember tundiya zilam, dewlet û DAIŞ’ê di îsyanê de ne” hat vekirin. Jinan ku gotin, “ev jiyan a me ye” Cadeya Îstîklal bi rengê mor boyaxkirin.

Jinên hatin qada ku ji aliyê polîsan ve hat dorpêçkirin, di bin siya TOMA’yan de daxuyanî dan. Di daxuyaniya ku ji aliyê Saniye Evren û Seher Çetîn bi Kurdî û Tirkî hat xwendin, jinan bi bîr xist ku li hember dijmintiya ku pergala kapîtalîst baviksalar  li hember bedena jinê pêk tîne li qadan in û gotin ku her cure tehekkuma AKP’ê ya li hember beden, nasname û keda jinê dixwaze pêk bîne red dikin.

Jinan diyar kirin ku wek jin wê li hember hovîtiya DAIŞ, serweriya zilam, komkujiyên li hember jinan û cinayetên nefretê têkoşînê bikin û li dijî tundiya dewlet û  DAIŞ’ê wê li kolanan bin.

Jinan piştî daxuyaniyê govend gerandin û sirûda Rojava gotin.