Parlamentera Şirnexê Newroz Uysal Aslan û Parlamentera Elîhê Zeynep Oduncu yên Partiya  Demokrasî û Wekheviyê ya Gelan (HEDEP), ji bo girtiyê ji sedî 93 astengdar Abdulalîm Kaya yê 80 salî serî li Komîsyona Lêkolîna Mafên Mirovan (ÎHÎK) a Meclîsê dan. 

'HEWCE YE BILEZÎNIN'

Di serlêdanê de hat ragihandin ku AbdulalÎm Kaya yê li Girtîgeha Girtî ya Tîpa M a Elîhê tê girtin, di wê rewşê de ye ku ew nikare bi tena serê xwe jiyana xwe bidomîne. Di serlêdanê de ev yek hatin gotin: "Li gorî agahiyên me yên derbarê rewşa tenduristiya Abdulalîm Kaya de ew in ku ew bi nexweşiya demansê ketiye. Her wiha çavê wî yê li aliyê çepê nabîne û guhê wî yê li aliyê çepê nabihîze. Her wiha hat zanîn ku gurçikên wî têk çûne û par ji ber nexweşiya xwe ya dilî anjîyografî  bûye."

Di serlêdanê de hat diyarkirin ku Nexweşxaneya Lêkolîn û Perwerdehiyê ya Sêrtê rapor daye Kaya ku ew ji sedî 93 astengdar e. Û ji komîsyonê hat xwestin ku divê ew bi lezgîn serêdana girtîgehê bikin. Di serlêdanê de taloqkirina înfaza Abdulalîm Kaya jî hat xwestin. Her du parlAmenteran pirsnameyek jî pêşkêşî Meclîsê kirin û xwestin Wezîrê Dadmendiyê Yilmaz Tunç bibersivîne.