Dayikên Roboskiyê di hefteya 151’emîn de çalakiya xwe ya ji bo edaletê berdewam kirin. Ferhat Encu di çalakiyê de axivî û bal kişand ser Roja Mafê Zarokan a Cîhanê û bibîr xist ku 19 zarok li Roboskiyê hatine qetilkirin, heta niha ti berpirsên wan nehatine darizandin.

Ji roja ku 34 ciwanên Kurd li gundê Roboskiyê yê navçeya Qilaban a Şirnexê di encama bombebarana balafirên şer ên artêşa Tirk de hatin qetilkirin,  malbat çalakiyên bi armanca daxwaza edaletê li dar dixin.

Ferhat Encu di çalakiyê de axivî û bal kişand ser komkujiya Dêrsimê got: “Ev sed sal in li ser vê axê komkujî pêk tên, lê heta niha ti hesab nehatiye dayin û berpirs nehatine darizandin. Yên ku li ser van komkujiyan rantê dikin, berpirsên van komkujiyan in.”

Encu diyar kir ku komkujiya Roboskiyê berdewama hişmendiya komkujiya Dêrsimê ye û da zanîn ku ew ê hesabê van komkujiyan bipirsin. Encu bal kişand ser gotûbêjên lêborîna ji bo Dêrsimê û destnîşan kir ku ev lêborîn ne ji dil e.

Encu bal kişand ser 20’ê Mijdarê Roja Mafê Zarokên Cîhanê û bibîr xist ku 19 zarok li Roboskiyê hatine qetilkirin, heta niha ti berpirsên wan nehatine darizandin.