Li Dergeha Elewiyan a Pîr Sultan a li Parîsê, ji bo hilbijartinên 1’ê Mijdarê civîna gel hat lidarxistin. Di civînê de parlamenterên HDP’ê Çîlem Oz û Mehmet Adiyaman, Koordînasyona Hilbijartinê ya HDP’ê ya Fransa û nûnerên FEDA amade bûn.

'LI HEMBER AKP Û ERDOGAN EM Ê AŞTIYÊ QÎR BIKIN'

Wekîlên HDP'yî di axaftinên xwe de bal kişandin ser atmosfera şer a AKP’ê li Kurdistanê ava kiriye û destnîşan kirin ku wê di vê atmosferê de hilbijartin pêk bê. Wekîlan wek berpirsyarê atmosfera şer a heyî AKP û Serokkomarê Tirk Erdogan nîşan dan û gotin: “Di 1’ê Mijdarê de li hember sorkirina şer em ê aştiyê qîr bikin.”

'PÊWÎST E HER KES TEVLÎ XEBATAN BIBE'

Di civînê de hat diyarkirin ku divê Elewiyên li Ewropayê dijîn bi xurtî xwedî li pêvajoyê derkevin û rolekî girîng bigirin ser milê xwe. Di dewama daxuyaniyê de wiha hat gotin: "Li Ewropayê di tevahiya pêvajoya dengdanê de pêwîst e hemû hêzên çep, sosyalîst û şoreşger bi ruhê seferbertiyê tevbigerin û pêşketineke bihêz bikin. Heta 25’ê Cotmehê roja dengdayîn bi dawî dibe divê her kes tevlî xebatên hilbijartinê yên HDP’ê bibe.”