Li salona kongreyê pankartên bi nivîsa "Siyaseta demokratîk nikare bê tasfiyekirin", "Dest ji aştiya civakî nayê berdan", "Em cesaretê belav bikin, hêviyê mezin bikin" û "Pêwîstî bi peymana civakî ya nû heye" hatin daliqandin.

Kongre bi beşdariya gelek delegeyan bi banga têkoşîna hevpar li bajarê Koln ê Elmanyayê pêk hat.

Piştî deqeyeke rêzgirtinê, Hevberdevkê HDK-A Elmanyayê Alî Mîtîl axivî.

Piştre Hevberdevka HDK-A Elmanyayê Elîf Sonzamanci mafê axaftinê girt û işaret bi têkiliyên qirêj ên navbera Tirkiye û Elmanyayê kir. Sonzamanci got, "Em li ber qedexeyên ku li ser me tên ferzkirin rabidin. Em ê van pêkanînên kêfî û qirêj ti carî qebûl nekin. Di çarçoveya kampanya 'Êdî bes e' de wê çalakiyên me dewam bikin."

Piştî axaftinan li pêşniyaran hate guhdarîkirin û kongre bi pirs û dayina bersivan dewam kir.

Li dû xwendin û nirxandina raporan, hilbijartina meclîsê hat kirin û ji bo desteya rêveber 9 kes hatin hilbijartin.

HDK-A heta niha li 14 bajarên Elmanyayê meclîsên xwe ava kiriye. Li 20 bajaran jî karê birêxistinkirinê dike.