Li Dersimê girtina Hevşaredara Dêrsimê Bîrsen Orhan bi daxuyaniyekî hate protestokirin. Daxuyanî li Kolana Hunerê hate lidarxistin. Di çalakiyê de pankarta “Em xwedî li îradeya xwe derdikevin, binçavkirin, girtin û zext nikarin me rawestînin” hate vekirin û gelek caran dirûşmeyên, “Qeyûm wê biçin, em ê bimînin” û “Zext nikarin me rawestînin” hatin berzkirin.

Parlamentera DEM Partî ya Dêrsîmê Ayten Kordu, parêzerê Bîrsen Orhan Kenan Çetîn, rêveberên DEM Partî yên navend û navçeyan tevlî daxuyaniyê bûn.

Parlamenter Ayten Kordu di daxuyaniyê de axivî û da zanîn ku qeyûmên hatine tayînkirin darbeya li dijî îradeya gel e û got her roj li vî welatî pêkanînên dijhiqûqî pêk tên. Ayten Kordu da zanîn ku daraz li gorî biryarên siyasî yên AKP-MHP’ê tevdigerin û got: “Dema edaleta rast pêk bê wê hemû bên darizandin. Wê hesab bidin vî gelî. Ev darbeyek li dijî demokrasî û îradeya gel e. Ev biryarek siyasî ye.”

Parêzerê Bîrsen Orhan, Kenan Çetîn jî axivî û da zanîn ku Bîrsen Orhan ji ber muxalefetê li van bariyeran kiriye hatiye girtin û got hiqûq ji her kesî re pêwist e.

Daxuyanî bi dirûşme û çepikan bidawî bû.