Xwendekarên kurd ên li Zanîngeha Mehmet Akîf Ersoy dixwînin, diyar kir ku ji ber komên nîjadperest ên bi alîkariya polîsan êrîşê li wan dikin nikarin biçin yurdê û dibistanê. Ji xwendekaran Avnî Polat diyar kir ku şevê din jî hevalekî wan rastî êrîşa bi kêran hat û wiha got: "Li Burdurê ji bo me agir hildibe. Ji kerema xwe xwendekarên kurd ên li vir bibînin û alîkariyê bikin."

Komên nîjadperest 3 rojin bi alîkariya polîsan êrîşî xwendekarên kurd ên li Zanîngeha Mehmet Akîf Ersoy a Burdurê dikin. Xwendekarên kurd diyar kirin ku ji ber tirsê naçin yurdan û dibistanê û xwendekarên kurd gelek diltirs in. Ji xwendekaran Avnî Polat anî ziman ku şeva borî li kampusa Dibistana Bilind a Pîşeyî di çarçoveya şahiyên biharê de konser hebû û piştî konserê xwendekarê bi navê Engîn Çakas rastî êrîşê hat.

Polat, da zanîn ku piştî Çakas agahî dan wan li ser kampusê kombûn lê li vir koma nîjadperest û polîsan careke din li vir êrîş li wan kir û 8 xwendekar birîndar kirin û ji ber darbeyên polîsan diranên 2 hevalên wan şikandin. Polat, bilêv kir ku piştî êrîşê polîsan 29 hevalên wan binçavkirin û êrîşan şevê din jî berdewam kir.

Polat, destnîşan kir ku şevê din ulkucuyekî araq vexwarî bi kêrê êrîş li hevalên wan kir û wiha got: "Piştî hevalê me xwe parast hemû ulkucu kombûn û xwestin bi ser yurda Saziya Yurtlar Krediyê de bigirin. Armanca wan ew bo ku li yurdê şer derbixin û hevalên wan ji yurdê derbixin û krediyên wan bidin birîn. Me hevalên xwe ji yurdê derxistin û birin malên xwe. Em niha nikarin biçin dibistanê û yurdê. Li Burdurê ji bo me xwendekarên kurd agir hildibe. Ji kerema xwe xwendekarên kurd ên li vir bibînin û dengê wan bibihîzîn û alîkariyê bikin."