'Em tevlî meşa li Brukselê ya 17'ê Mijdarê bibin'
Saziyên Kurdan û demokratîk ên li Fransayê, ji bo meşa 17'ê Mijdarê ya li Brukselê banga tevlîbûnê kir.
CDK-F, Tevgera Jinên Kurd, CÎK, FEDA, HDK-F, ATÎK, ADHK-FDHF, ACTÎT û Yekîtiya Jinên Sosyalîst daxuyaniyeke hevpar a nivîskî weşandin.
Di daxuyaniyê de hat ragihandin, dewleta Tirk li dijî gelê Kurd û hêzên demokrasiyê dest bi şerekî topyekûn kiriye û hat destnîşankirin, ku bersiva li vî şerî bi berxwedana topyekûn dibe.
Di daxuyaniyê de hat gotin, "Divê em vê rastiyê bibînin û li qadan bin. Ji bo em faşîzma AKP'ê û dîktatoriya Erdogan li nava raya giştî ya Ewropa û cîhanê teşhîr bikin û pêşî lê bigirin, weke eniya berxwedanê, di 17'ê Mijdara 2016'an de di serî de saz û rêxistinên çep, demokrat û şoreşger, gelê Kurd, Tirk, Elewî û Êzidî tevlî meşê bibin."
