Dayikên / Mirovên Şemiyê her hefte ji bo aqûbeta xizmên xwe yên di bin çavan de hatine qetilkirin, bipirsin û ji bo faîl bên darizandin li Qada Galatasarayê tên ba hev. Di hefteya 987’emîn de aqûbeta Mûrat Yildiz hate pirsîn ku 23’yê Sibata 1995’an li Îzmîrê dema 19 salî bû hate binçavkirin û piştre hate qetilkirin. Ji xeynî Dayikên Şemiyê endamên Komîsyona Girtîgehan û Şaxa Stenbolê ya Komeleya Mafên Mirovan (ÎHD) û Konfederasyona Sendîkayên Kedkarên Kamûyê (KESK) û parêzvanên maf beşdarî çalakiyê bûn.

Daxuyaniya çapemeniyê ji aliyê keça Fehmî Tosûn ku di bin çavan de hate windakirin, Besna Tosûn ve hate xwendin. Besna Tosûn destnîşan kir ku ew ji bo aqûbeta Mûrat Yildiz bipirsin û li bîra dewletê bixin ku berpirsyariyên xwe yên ji bo “mafê jiyanê” pêk bînin, li Galatasarayê ne.

Dayika Yildiz, Hanîfe Yildiz jî wiha got: “29 sal in çima ez li vir im? Ti dayik naxwazin ku zarokên wê beriya wê bikevin goristanê. Ez hatim vî temenî û min ji bo xwe kurê xwe goristan xwest. Ew jî nehat dayîn. Hûn li êşkencexaneyan bi tunekirina canên me û bêgoristan hiştinê dihesibînin ku we daye jibîrkirin? Ez ê mafê xwe ji bo we nehêlim, ez ê timî li heman qadê pirsa kurê xwe bikim. Me tevlî siyaseta xwe ya qirêj nekin.”