Çeteyên DAIŞ'ê ku ji bo "xwe ewle nebînin" gef li rojnamevanan xwar, topên hawanê avêtin rojnamevanên li girê çapemeniyê yê li pêşberî gundê Edmanek ê Pirsûsê, ku li eniya rojhilat e.

Ji bo şopandina berxwedana Kobanê ya 70 roj in dewam dike, li nêzî gundê Edmanek ê Pirsûsê Midûriyeta Enformasyonê û Çapemeniyê ya Serokwezaretiyê ji bo rojnamevanan girê çapemeniyê ava kiribû. Li girê nêzî deriyê sînor ê Murşîtpinarê, rojnamevan ji roja destpêkê û vir ve lê ne. Çeteyên DAIŞ'ê beriya çend rojan di ser hesabê twitterê de gef li rojnamevanên li vir xwaribû û gotibû, "Çapemenî li cihekî kom bûye, bila xwe ewle nebîne". Çeteyan îro jî hawan avêtin girê çapemeniyê. Bi şensê tiştek bi kesî nehat û topa hawanê sed metre li rojavayê gir ket.

Ji ber daxwaza Tirkiyeyê ya avakirina 'herêma ewlekariyê' ya 10 km li nav sînorê Tirkiyeyê û ji bo qebûlkirina vê daxwazê li qada navneteweyî, ev hewldanên DAIŞ'ê û valakirina gundên Zehwan û Kobanê Serxetê ji aliyê leşkerên Tirk ve, weke hewldanên ji bo gihaştina heman armancê tên şîrovekirin.