Li hemberî girtina Hevserokên Giştî yên Partiya Demokratîk a Gelan (HDP) Fîgen Yuksekdag û Selahattîn Demîrtaş û 8 parlamenterên HDP'ê nerazîbûn her diçe zêdetir dibe. Serokê Giştî yê Partiya Azadî û Sosyalîzmê (OSP) Sînan Çîftyurek têkîldarî girtina hevserok û parlamenterên HDP'ê û biryara HDP'ê ya sekinandina karên xwe yên li parlamentê nêrînên xwe parve kir. Çîftyurek destnîşan kir gelê kurd dikare parlamentoya xwe li Amedê ava bike u bi awayekî azad xwe bi rêve bibe. 

'RÛYÊ AKP'Ê YÊ QIRÊJ LI HOLÊ YE'

Serokê Giştî yê OSP'ê Çîftyurek girtina Hevserokên Giştî yên HDP'ê Selahattîn Demîrtaş û Fîgen Yuksekdag û 8  parlamenteran şermezar kir û wiha axivî: “Bi rastî çi dibe bila bibe parlementerên ku ji aliyê gel ve bi milyonan dengan hatin hilbijartin divê niha li derve di nav gel û parlementoyê de siyasetê bikin. Lê hikûmet her tim siyaseta kurd asteng dike û herî dawî hikûmetê bi girtina parlementeran  re qirêjiyên xwe û ruyê xwe yê qirêj careke din derxist holê. Ev nayê qebûlkirin û ez wekî kurdekî vê helwesta AKP û Erdogan bi tundî şermezar dikim.”

'BILA LI AMEDÊ PARLAMENTOYA KURD BÊ AVAKIRIN'

Çîftyurek da zanîn ku dewlet dibêje ew hebûna gelê kurd nasnakin û axaftina xwe wiha berdewam kir: “Em şaredaran hildibijêrin ew şaredarên me ji kar digirin û şûna wan qeyûman tayîn dikin. Em parlementeran hildibijêrin ew wan digirin û divêjin hundir. Ger ew me nas nekin em jî wan nas nakin. Pêşniyara min ji bo HDP’ê ew e ku ger hikûmet siyaseta xwe wiha berdewam bike, bila ew jî ji parlementoyê bi temamî vekişin û parlementoya xwe li Amedê ava bikin.”

'TI FERQA AKP, MHP Û CHP'Ê TINEYE'

Çîftyurek destnîşan kir ku ji avakirina komarê heta niha hemû partî û rêxistinên Tirkiyeyê gelê kurd wekî dijmin dîtin û axaftina xwe wiha domand: “Dema ku mijara Kurd û Kurdistanê derket holê ji avakirina komarê heta niha hemû partî û rêxistinên Tirkiyeyê dibin yek û li hemberî gelê kurd siyasetekî kirêt didin meşandin û ji bo mafê gelê kurd tu gavan naavêjin. CHP jî û MHP jî li dijî siyaseta HDP’ê AKP’ê cûdatir nîn in. Hemû dibin yek û bi her awayî siyaseta HDP’ê nas nakin û mafê gelê kurd bi awayekî hovane binpê dikin.”

'SERKETIN A ME YE'

Çîftyurek di dawiya axaftina xwe de wiha got: “Ev rojên tarî wê derbas bibin û gelê me wê di van tengasiyan de bi berxwedanekî xurt derbikeve. Niha şûn de li Kurdistan û  Başûr serxwebûn dixwaze û Kurdistana Rojava ya Federasyon heye. Tu kes nikare niha şûn de bibêje Kurd tune ne. Bila dewleta tirk baş bizane ku gelê kurd di çar perçeyên Kurdistanê berxwedanê didin meşandin û xwedî maf in. Bila dewleta tirk nebêje kurd tune ne û siyasetmedarên kurd bigire biavêje hundir êdî bila dewleta tirk van tiştan ji  bîr bike. Em bawerin ku di demek nêz de em ê bi ser bikevin. Serketin a gelê kurd e.”