CAN TV ku dixwaze bibe dengê Elewiyan, li ser peyka Eutelsat-Hotirdê 1'ê Gulana 2018'an dest bi weşanê dike.

Desteya Weşanê ya CAN TV daxuyaniyek da û got, "Li dijî kesên ku dixwazin dengê Elewiyan bibirin, em ê di rêya heq û heqîqetê de dengê xwe bilind bikin."

Desteya Weşanê ya CAN TV zext û zordariya li Tirkiyeyê ya li ser mûxalîfan şermezar kir û got, "Li dijî vê rejîma ku li ser tinekirina gel û baweriyên cuda ava dibe, em ê dengê xwe bilind bikin. Em bang dikin ku tavilê dawî li van zext û zordariyan bê anîn."

Di daxuyaniyê de bi taybetî bal hate kişandin ser polîtîkayên çavtirsandin û tepisandina civak û medya Elewiyan û hate gotin, "Em dixwazin hemû mafên TV10 û YOL TV ên bi biryarnameyan hatin girtin bên radestkirin û malên wan ên hatine desteserkirin ji xwediyan re bên dayin. Cewhera xeta me ya weşanê, rabûna li ber her şêwe êrîşên li dijî baweriya Elewiyan e. Em ê xizmetê ji wê yekê re bikin ku civaka Elewî weke civakeke azad û wekhev a mîna bawerî û civakên din, karibe çand û baweriya xwe bijî. Bi vê armancê em ê hem nûçe û agahiyên rast bigihînin Elewiyan, hem jî nûçe û agahiyên rast ên li ser Elewiyan bigihînin civak û baweriyên din."

Di dewama daxuyaniyê de hate destnîşankirin ku CAN TV wê hurmetê nîşanî hemû nêrînên cuda bide û hate ragihandin ku Ji bo parastin û danasîna çand û baweriya Elewiyan, wê bernameyên pêwîst amade bikin û hemû derfetên xwe bi kar bîne.