Li bajarê Mîlano yê Îtalyayê, li bajarê Bordeaûx ê Fransayê û li bajarê Nottîngham ê Îngilîstanê çalakiyên girseyî hatin lidarxistin.

MÎLANO

Li bajarê Mîlano yê Îtalyayê, greva birçîbûnê ya ji bo 3 rojan, qediya. Gelek şoreşger, sosyalîst û nûnerên saziyên anarşît, greva li Pîazza Cordûsîo ziyaret kirin û destek dan. Di çalakiyê de belavok hatin belavkirin û Zanyarê Zimanê Erebî yê Zanîngeha Katolîk a Mîlanoyê Prof. Paolo Branco axivî. Branco fikarên xwe yên li ser pêvajoya siyasî ya li Tirkiyeyê anî ziman. Branco destnîşan kir, ku wijdanê mirovahiyê di îmtihanekê de ye û got, "Hêvîdar im bêyî ku tiştek bi kesî were, grevên birçîbûnê biqedin."

BORDEAÛX

Li bajarê Bordeaûx ê Fransayê mîtîngek hate lidarxistin. Li Bordeaûxê wê îro jî greva birçîbûnê dest pê bike.

Nûnerên Navenda Civaka Demokratîk a Kurd li Bordeaûxê, endamên Komunîstên Ciwan ên Fransayê û dostên Kurdan li vir axivîn û bal kişandin ser girîngiya pêvajoyê.

Gel li ber avahiya Şaredariya Bordeaûxê i hev civiya û bi qîrîna dirûşmeyan destek dan girtiyên di greva birçîbûnê de ne.

Her wiha hat ragihandin, ku wê ji bo destekkirina çalakgeran, greva birçîbûnê ya bêdem were destpêkirin.

NOTTÎNGHAM

Li bajarê Nottîngham ê Îngilîstanê, mîtîngek hate lidarxistin.

Di vê mîtîngê de dîktatoriya Erdogan û polîtîkayên dewleta Tirk hatin teşhîrkirin. Hat gotin, wê îro jî greva birçîbûnê ya bêdem-dorveger bê destpêkirin.