Karwanê Alîkariyê yê xelkê Şengalê ku ji bo koçberên Efrîn û Şehbayê hatibû komkirin, tevî şandeyek ji Rêveberiya Xweser a Şengalê û Rojavayê Kurdistanê gihîşt Rojavayê Kurdistanê.
Alîkariya ku bi pêşengiya Rêveberiya Xweser a Şengalê û Tevgera Azadiyê ya Jinên Êzidî (TAJÊ) ji 8'ê Kanûna 2024'an û vir ve ji bo koçberên Şehba, Til Rifat û Efrînê hate komkirin, piştî hewldaneke berfireh derbasî Rojavayê Kurdistanê bû.
Li gorî agahiyan, rayedarên Iraqê ji 12 qemyonên bi alîkariyê barkirî, destûra derbasbûna 3 qemyonan dan.
Hate ragihandin ku rayedaran soz dan ku qemyonên mayî jî weke karwanekî duyemîn derbas bibe.
Her sê qemyonên ji barê alîkariyê, ji Deriyê Sînor ê Til Koçerê derbasî Rojavayê Kurdistanê bûn.
Şande wê pêwîstiyên jiyanî û bi taybet jî pêwîstiyên zarokan ku li gel xwe birine radestî koçberên Efrîn û Şehbayê bike.
