Yek ji 14 berxwedêrên greva birçîbûnê yên li Strasbourgê Şiyar Serxwebûn bû ku ji Berlînê tevlî çalakiyê bû.

Şiyar Serxwebûn û hevalên wî ku 17'ê Kanûna 2018'an dest bi greva birçîbûnê kirin, bi banga Ocalan 26'ê Gulanê dawî li çalakiya xwe anîn. Serxwebûn piştî çalakiyê vegeriya Berlînê û bi kulîlkan hate pêşwazîkirin.

Serxwebûn piştre çû Navenda Civaka Azad a Berlînê û li wir jî girseyeke Kurdistaniyan ew pêşwazî kir. Piştre di dema fitarê de ji girseya gel re axivî. Serxwebûn anî ziman ku 161 rojî wan bi biryardarî û moral li ber xwe dane.

Serxwebûn diyar kir, ji bo azadiya Ocalan wê ji niha û pê ve bêhtir bixebitin û got, "Ji ber ku em ji Serok Apo, partiya xwe, gelê xwe û şehîdên xwe hez dikin. Em ê hevalên xwe yên di dema berxwedana greva birçîbûnê de şehîd bûn ti carî ji bîr nekin. Em ê heta dawiyê xwedî li berxwedana wan derkevin."

Piştre ji 4 çalakgerên li Berlînê li dijî tecrîdkirina Ocalan ketin greva birçîbûnê Mûstafa Tûzak axivî û got, "Têkoşîna ji bo azadiya Ocalan divê bênavber bidome."