Belgeya hemşehritiya rûmetê li Bercetoyê bi merasîmekê hate pêşkêşkirin. Şaredar Lûîgî Lûcchî belge da parêzera Ocalan Newroz Ûysal.

Lûcchî di merasîmê de axivî û bal kişand ser komkujiyên ku heta niha li gelê Kurd hatine kirin. Lûcchî diyar kir ku gelê Kurd êdî bi tenê nîne û wê teqez mafên xwe yên bingehîn werbigirin.

Ûysal piştre axivî û destpêkê spasiya şaredar û endamên meclîsa şaredariyê kir ku biryareke bi vî rengî ya watedar wergirtine.

Ûysal bi bîr xist ku Ocalan 20 sal in li giravekê tecrîdkirî ye û got, bidawîbûna tecrîdê û pêkhatina azadiya Ocalan bi piştevanî û têkoşîneke navneteweyî dikare pêk were.

Komîteya piştevaniya gelê Kurd jî bi daxuyaniyekê bang li her kesî kir ku li têkoşîna azadiyê ya Kurdistanê bibin xwedî.

Merasîm bi stranên muzîsyenên Kurd û Îtalyayî û bi helbestan bi dawî bû.