Çalakiya rûniştinê ya roja Duşemê dest pê kir, ji bo Komîteya Pêşîgirtina li Êşkenceyê ya Konseya Ewropayê biçe Girava Îmraliyê, dewam dike.

Çalakiya ku bi sedan kes tevlî bûne, di roja sêyemîn de ye.

Di nava rojê de, parlamenterê Tevgera Goran Dr. Şêrgo Hema Emîn û Hevserokê KONGRA GEL Remzî Kartal di civînekê de ji çalakgeran re axivîn û rewşa dawî ya li Kurdistanê û herêmê nirxandin.

Çalakger di nava rojê de çûn ber avahiya Konseya Ewropayê û li vê derê heta demekê daxwazên xwe yên ji bo azadiya Ocalan bi dirûşman anîn ziman.

AVEG-KON: TÊKOŞÎNA GELÊ KURD TÊKOŞÎNA ME YE

Bi navê Konfederasyona Koçberên Bindest li Ewroayê (AvEG-Kon) Şafak Arabaci li çalakiya rûniştinê peyivî û daxwaza azadiya Ocalan kir.

Arabaci anî ziman, ku daxwazên gelê Kurd û têkoşîna gelê Kurd a azadiyê ew weke têkoşîna xwe dibînin û got, ew hevrêyên lehengên ku li Rojava li dijî çeteyên DAIŞ'ê şer dikin.

Arabaci got, "Gelê Kurd bi dehan salan e berdêlên gelekî giran dide û em pê zanin ku malek nemaye şehîdê xwe nîne" û destnîşan kir, ku ew bi taybetî xwedî li têkoşîna jinên Kurd derdikevin.

Arabaci da zanîn, ku wê têkoşîna hevpar bidmînin û hêvî dikin ku di demeke kin de li ser tenduristiya Ocalan agahiyeke zelal bi dest bikeve.

BI DEHAN SAZÎ, ŞEXSIYET Û HUNERMENDAN DESTEK DAN

Di roja duyemîn a çalakiya rûniştinê de zêdeyî 300 kes li qada çalakiyê amade bûn. Tevî nûnerên bi dehan saziyên Kurdan ên li Ewropayê, parlamenterên YNK û Tevgera Goran jî piştgiriyê didin çalakiyê.

Her wiha gelek kesayetên Tirkiyeyî jî yekser cihê xwe di nava çalakiyê de digirin û dibêjin, heta CPT bersivê bide daxwazên wan, wê çalakiya xwe bidomînin.

SAZÎ, KESAYET Û HUNERMENDÊN PIŞTGIRIYÊ DIDIN ÇALAKIYÊ

Nûnerên saziyên duh tevlî daxuyaniya çapemeniyê bûn û piştgirî dan çalakiya rûniştinê ev in:

"Kongreya Gel, Kongreya Civaka Demokratîk a Kurdistaniyên li Ewropayê (KCDK-E), Tevgera Jinên Kurd li Ewropayê (TJK-E), Navenda Civaka Demokratîk a Kurdên li Elmanyayê (NAV-DEM), Navenda Civaka Kurd li Fransayê (CDK-F), NAV-BEL, DEM-NED, Meclîsa Êzidiyan a Şengalê, Saziya Malbatên Şehîdan (KOMAW), Civaka Îslamî ya Kurdistanê (CÎK), NAV-YEK, Platforma Kurdên Anatoliya Navîn (PKAN-E), TEV-ÇAND, Kongreya Neteweyî ya Kurdistanê (KNK), Tevgera Goran, Yekîtiya Niştimanî ya Kurdistanê (YNK), Partiya Yekîtiya Demokratîk (PYD), PJAK, Partiya Demokratîk a Gelan (HDP), Kongreya Demokratîk a Gelan li Ewropayê (HDK-E), Partiya Komunîst a Kurdistanê, Partiya Demokrat a Kurdên li Sûriyeyê (PDK-S), Partiya Îslamî ya Kurdistanê (PÎK), Partiya Sosyalîst a Bindestan (ESP), Konfederasyona Koçberên Bindest li Ewropayê (AvEG-KON), Platforma Derya Reş a Şoreşger, Federasyona Karkerên Tirkiyeyî li Ewropayê (ATÎK), Federasyona Komeleyên Karkerên Demokratîk (DÎDF), Konfeerasyona Gelên Demokratîk ên Ewropî (ADHK), Kongreya Gel a Mezopotamyayê, Cîhaneke lê bê jiyîn, NOR-Zartonk, Federasyona Yekîtiyên Dersimê yên Demokratîk li Ewropayê (ADEF), Partiya Kesk û Paşeroja Çep, Partiya Şoreşger, Navenda Çandê ya Koçgirî li Ewropayê, Hewldana Mereşê ya Ewropayê, Însiyatîfa Gel a Kurecikiyên li Ewropayê û Meclîsa Jinên Êzidî.)

Li gel nûnerên van hemû saziyan û parlamenterên ji Başûrê Kurdistanê gelek kesayet jî ya yekser tevlî çalakiyê bûne ya jî destekê didin. Çend ji van kesayetan jî ev in: Endamê Heyeta Îmraliyê Hatîp Dîcle, siyasetmedar Hecî Ehmedî, parlamenterên HDP'yî Tûgba Hezer û Faysal Sariyildiz, Hevşaredara Cizîrê Leyla Îmret, akademîsyenên ji bo aştiyê Çetîn Gurer û Engîn Sûstam, rojnamevan-nivîskar Ahmet Nesîn, rojnamevan Veysî Sarisozen û Fîlîz Koçalî, nivîskar Azîz Tûnç, ji Nifşên 68'an siyasetmedar Mahîr Sayin, ji parêzerên Ocalan Mahmût Şakar û hunermend Hozan Emekçî, Hozan Xelîl Xemgîn, Hozan Sosin û Hozan Seyidxan.