Çalakiya 'Nobeda Azadiyê' ku ev 5 sal in ji bo azadiya Rêberê Gelê Kurd Abdullah Ocalan li ber avahiya Konseya Ewropayê tê lidarxistin, vê hefteyê ji aliyê jinên ji Rojhilatê Kurdistanê ve tê lidarxistin.
Endamên Civaka Jinên Azad a Rojhilatê Kurdistanê (KJAR) roja Duşemê nobed dewr girtin. Endamên KJAR'ê ji hingî ve belavok û broşurên li ser jiyan û nêrînên Ocalan belav dikin.
Çalakgeran li ser nobeda xwe ji ANF'ê re axivîn û gotin, eleqeyeke mezin ji bo têkoşîn û nêrînên Ocalan hene. Endamên KJAR'ê diyar kirin, mirovên li herêmê dixwazin li ser Kurdan û têkoşîna wan hê bêhtir agahiyan bigirin.
Çalakgeran bal kişandin ser girîngiya çalakiyên li gelemperiya cîhanê yên ji bo azadiya Rêberê Gelê Kurd Abdullah Ocalan û gotin, ew jî dixwazin tevkariyê li vê yekê bikin.
Jinan diyar kirin, Ocalan ne tenê ji bo Rojhilatê Kurdistanê, her wiha ji bo çareseriya pirsgirêkên li gelemperiya Kurdistanê û Rojhilata Navîn xwedî pêşniyaran e û gotin, ew êdî nikarin xwe li esareta wî rabigirin.
Nobeda 'Azadî ji Ocalan re' ku di 25'ê Hezîrana 2012'an de dest pê kir, ev 5 sal in bi rengekî bê navber dewam dike. Hefteya derbasbûyî, bi wesîleya salvegera pêncemîn, hevserokên pêkhateyên Kongreya Civaka Demokratîk a Kurdistaniyên li Ewropayê (KCDK-E) nobed girtibûn. Piştî nobeda hevserokan, bi beşdariya gelek parlamenterên Ewropî û parlamenterên HDP'ê mîtîngek hatibû lidarxistin.
