Partiya Azadiyê ya Mezopotamyayê bi wesîleya salvegera Pêngava 15'ê Tebaxê daxuyaniyeke nivîskî weşand.

Di daxuyaniyê de li ser navê gelê Asûrî/Suryanî/Keldanî pêngava şoreşgerî ya 15'ê Tebaxê hat silavkirin û di şexsê fermandarê efsanewî yê vê pêngavê Mahsûm Korkmaz (Egîd) de hemû şehîdên şoreşê bi rêzdarî û minetdarî hatin bîranîn. Her wiha serketina Minbicê ya têkoşîna hevpar a gelan, ku li vê dema dîrokî rast hat, hat silavkirin.

Partiya Azadiyê ya Mezopotamyayê da xuyakirin, ku pêngava şoreşgerî ya 15'ê Tebaxê rêveçûna serberjêrî ya li erdnîgariya Mezopotamya/Kurdistanê sekinand û dîrok ji bo gelan guherand. Di daxuyaniyê de hat destnîşankirin, ku pêngava şoreşgerî ya 15'ê Tebaxê, tevî ku roja vejînê ya gelê Kurd e, d heman demê de ji bo gelên din jî roja lêgerîna li nasnameya xwe, rêxistinbûna li dijî zilmê û hembêzkirina jiyanê ye.

Daxuyaniyê wiha dewam kir: "Gelên di bin zilma dewleta Tirk de ne, bi saya vê pêngavê li dijî zîhniyeta nîjadperest îro xwe îfade dikin, mafên xwe yên demokratîk bilêv dikin û doza jiyana hevpar dkin. Pêngava şoreşger a 15'ê Tebaxê çarenûsa nebaş a erdnîgariya Mezopotamya/Kurdistanê guherand, hemû polîtîkayên hêzên mêtînger ên hesab li ser herêmê dikirin deşîfre kirin û li dijî van planan zîhniyetke alternatîf a demokrasiyê afirand."

Partiya Azadiyê ya Mezopotamyayê bal kişand ser têkiliya navbera Pêngava 15'ê Tebaxê û Şoreşa Rojava û got, "Ev pêngav li dijî hemû hêzên dixwestin Rojhilata Navîn bikin dojeh, pêngaveke dîrokî bû."