Rêxistinên DBP'ê yên Navçeyên Haliliye û Eyûbiye 1'emîn kongreyên xwe yên asayî li avahiya Halîliyê pêk anîn. Parlamenterên HDP'ê yên Rihayê Îbrahim Ayhan, Dîlek Ocalan, endamê Meclîsa DBP'ê Hediye Karaaslan, Semira Kut û gelek nûnerên saziyen sivîl ên civakî amade bûn. Di kongreyê de Hevserokê HDP'e yê Rihayê Ridvan Yavuz, bal kişand ser doza Komkujiya Pirsûsê ku sibê li Kampusa Girtîgeha Hilvanê pêk bê û xwest her kes beşdarî rûniştina dozê bibin.

'TEKANE ROJEVA ME TECRÎD E'

Parlamenterê HDP'ê yê Rihayê Îbrahim Ayhan jî bal kişand ser tecrîda li ser Rêberê Gelê Kurd Abdullah Ocalan û diyar kir ku kengî şer sor bibe tecrîd jî giran dibe û wiha got: "Kengî şer dest pê dike tecrîda li ser Birêz Ocalan jî giran dikin. Tecrîda li ser Birêz Ocalan tê meşandin, tecrîda li ser demokrasiyê ye. Tecrîda li ser azadiyê ye. Tecrîda li ser aştiyê ye. Ji bo em tecrîda li ser aştî, azadî û demokrasiyê qebûl nekin divê em tecrîda li ser birêz Ocalan qebûl nekin. Derketina li dijî tecrîdê parastina demokrasiyê ye. Rabûna tecrîda li ser Ocalan  şer û kaosê jî wê bi dawî bike. Em êdî vî şerî û vê kaosê naxwazin."

YÊN KU XANIYÊN GEL XERA DIKIN, EW BI XWE TERORÎST IN

Parlamentera HDP'ê Dîlek Ocalan jî gotina Serokomar Recep Tayyip Erdogan  a “Qelen bibirin, bizewicin, zêde bibin. Divê misilman zêde bibe. Li Tirkiyeyê rêxistinên terorê di vê mijarê de pir hesas e. Herî kêm 10, 15 zarokên wan hene" şermezar kir û wiha got: "Ev gotina Erdogan di cîhanê de sosreteke ewil e. Serokomar radibe ji gel re dibêje hûn terorîst in. Ji Kurdan re dibêjin hûn hemû terorîst in. Yên ku mala kurdan xera dikin ew bi xwe terorîst in. Yên terorîst ew kesên ji Kurdan re dibêjin terorîst bi xwe ne."

Piştî raporên malî û xebatan hatin xwendin hilbijartin pêk hat. Di kongreya Eyyubiyê de ji bo hevserokatiyê Sûphî Aksan, Cennet Lale; di kongreya Haliliye de jî Mahmut Manas û Leyla Daghan  hatin hilbijartin.