Greva birçîbûnê ya bêdem û bêdorveger a endamê Nûnertiya HDP’ê ya bajarê Hewlêr a Başûrê Kurdistanê Nasir Yagiz, di roja 89’an de ye. Her diçe di aliyê fîzîkî û tenduristiyê de rewşa Yagiz giran dibe û êdî laşê wî dilerize.

Sibeha nikare rabe, bêhal bûye û nikare çongên xwe jî bikişîne ber xwe.

Her wiha Yagiz li hemberî deng û ronahiyê jî gelek hesas bûye. Dilê Yagiz, geh zêde lê dide û geh jî kêm. Yagiz êdî hatiye ber rewşeke wiha bi zorê dikare avê vexwe. Piranî nema dikare rakeve û êşa wî ya serî lê giran bûye. Dîsa dema av, an cûreyên vexwartekan vedixwe, mehdê wî dixele vedireşe. Her wiha ji rewşên berê cudatir êdî laşê wî dilerize, nikare xwe bigire. Ji her alî ve di aliyê fîzîkî û tenduristiyê de rewşa Yagiz êdî giran dibe.

Li aliyê din, greva birçîbûnê ya li Wargeha Penaberan a Şehîd Rûstem Cûdî-Mexmûrê jî bi koma 22'an dewam dike. Greva birçîbûnê ya bêdawî û bêdorveger a endama Koordînasyona Meclîsa Îştarê Fedîle Tok jî di roja 29’ê de ye. Tok bi biryardarî çalakiya xwe didomîne.