Dewleta Tirk bi navê pêvajoya aştiyê hewla siyaseta sextekariyê dide da ku ji bo êrişkirina li ser gelê Kurd xwe amade bike. Têkildarî vê rewşê nivîskar Adil Osman ji ANF’ê re axivî.

Di destpêka axaftina xwe de Adil Osman behsa wê yekê kir ku şerekî dîrokî li gel dewleta Tirk li Kurdistanê didome û got: “Dewleta Tirk niha êrişên xwe li ser başûrê Kurdistanê û Herêmên Parastina Medyayê zêde kirine, dixwaze ji bo pêkanîna siyaseta qirkirinê encamekê bi dest bixe. Li hemberî êrişan berxwedan û têkoşîneke mezin heye û vê yekê dewleta Tirk neçarî sekinandinê kiriye û li başûrê Kurdistanê xeniqandiye. Dewleta Tirk hewl dide li hemû qadan destkeftiyan bi dest bixe da ku bikare careke din xwe zindî bike û êrişî ser gelê Kurd bike. Di êrişên xwe de encamek bi dest nexistiye, li qadên şer û cîhanê bi tenê maye, şiyana wê ya serkeftinê tune ye.”

‘DEWLETA TIRK HEWLA SIYASETA SEXTEKARIYÊ DIDE’

Adil Osman her wiha got: “Dewleta Tirk hewla siyaseta sextekariyê dide, bangewaziya aştiyê dike lê mesele ne aştî ye, şêweyekî din ê şerê taybet e, dixwaze Birêz Ocalan were parlamentoyê û bibêje PKK belav dibe. Li pişt van tiştan armancek heye, ew jî rewakirina êrişan e û xweamadekirin e ji bo êrişên din. Di rewşa niha de hikûmeta Iraqê bi dezgehên xwe yên sîxuriyê dixwaze here cem PDK’ê û paşê biçe ba Tirkiyeyê da ku peymanekê pêk bînin.”

‘RÊBER APO Û PKK SEXTEKARIYA DEWLETA TIRK DIZANIN’

Her wiha Adil Osman diyar kir ku Rêber Apo û PKK kesayetên asayî nîn in ku bên xapandin û wiha domand: “Rêber Apo û PKK bi sextekariya dewleta Tirk dizanin, demekê gotûbêj hebûn ku gihîştibûn Lihevkirina Dolmabaxçeyê, lê sîstema faşîst a dewleta Tirk û Erdogan ev yek hilweşand, ji ber ku dizanin aştî li berjewendiyên wan nayê.

Çareseriya doza Kurd divê rasteqîne be, bi sextekariya dewleta Tirk nabe. Birêz Ocalan û Murat Karayilan jî ev yek anîn ziman ku eger pêvajoyeke aştiyê ya rasteqîne hebe, ew dikarin vê mijarê ji qada tundûtijiyê biguherînin bo qada hiqûq û siyasetê, ji ber ku dema ku bû hiqûqî, wê demê hebûna Kurdan tê naskirin.”

‘DIVÊ ÇAVÊ GELÊ KURD LI PROPAGANDAYA DEWLETÊN DAGIRKER NEBE’

Adil Osman di dawiya axaftina xwe de wiha got: “Divê çavê gelê Kurd li propagandaya dewletên dagirker nebe, bi taybetî li başûrê Kurdistanê. Ez daxwazê ji xelk dikim ku baweriya xwe bi wê bangewaziya aştiyê ya dewleta Tirk neynin û nexapin û nebêjin ku pêvajoya aştiyê heye û PKK xwe nade ber, ji ber ku di rastiyê de ev yek ne aştî ye, siyaseteke xapandinê ye.

Li derveyî gotûbêjkirina li gel Birêz Ocalan aştî tune ye, pêwîst e gelê Kurd li ser maseya gotûbêjkirinê hebe, ne ku dewleta Tirk bi xwe biryaran bide. Pêwîst e têgihîştina rewşenbîr û xelkê başûrê Kurdistanê bi wijdanî be, pêwîst e li hember hewl û têkoşîna bakurê Kurdistanê û têkoşîna azadiya gelê Kurd, bi pîvanên bakurê Kurdistanê tev bigerin û her tim li dijî dewleta Tirk bin.”