Di 24’ê Hezîrana 2023’an de hêzên siyasî û civakî yên Şengalê bi navê Koordînasyona Hêz û Pêkhateyên Şengalê, yekîtî û tifaqa xwe ragihandibûn da ku pirsgirêkên Şengalê bi yek dengî çareser bikin. Di vê tifaqê de PADÊ, Teqedûm û YNK weke partiyên siyasî cih girtibûn, her wiha Mesîhî, Sune, Şîa û Tirkmenên herêmê jî li ser navê gel û baweriyên Şengalê beşdarî vê tifaqê bûn.

Vê tifaqê di 9’emîn salvegera fermanê de li Şengalê komxebatekê bi navê ‘’Yekîtîya me hêza li dijî zilmê ye’’ lidarxist ku hemû hêz û aliyên Şengalê û deşta Nînowayê beşdar bûn û peyamên girîng ji bo dahatûya Şengalê dan. Nûnerê Mesîhiyên li Şengalê, Gabrîel Şemûn jî yek ji beşdarên komxebatê bû ku derbarê tifaqê û komxebatê de ji ANF'ê re axivî.

'DIVÊ HIKUMETA IRAQÊ BERPIRSYARIYÊN XWE PÊK BÎNE'

Gabrîel Şemûn di destpêka axaftina xwe de kêfxweşiya xwe ya ji bo tifaqê anî ser ziman û got: "Têkilî û danûstandin nebe tiştek çênabe. Lazim e hemû civakên li Şengalê ji hevûdû fêhm bikin. Hikumeta Iraqê pêwîst e berpirsyariyên xwe yên li ber civaka Êzidî û her wiha Mesîhiyan pêk bîne. 300 keçên me li ba DAÎŞ'ê dîlgirtî ne, em nikarin xwe bigihînin wan. Lazim e van keçikan vegerin nav malbat û civaka xwe."

'3 DÊRÊN MESÎHIYÊN LI ŞENGALÊ HILWEŞANDÎ NE'

Gabrîel Şemûn derbarê rewşa Mesîhiyên li Şengalê jî ev agahî dan: "Niha li Şengalê her 3 dêrên me jî xirakirî ne, 70-80 malên me şewitîne,  derfetên me kêm e ku em bi hêza xwe van safî bikin. Eger wisa dewam bike, gelek ji me wê li vî erdî nemînin. Dewleta Iraqê lazim e girîngî bide vê mijarê, heqê herkesî li wan vegerîne."

'ME DIVÊ XWESERIYA ŞENGALÊ HEBE'

Nûnerê Mesihiyan Şengalê Gabrîel Şemûn herî dawî jî daxwaza gelên Şengalê ya mafê xwerêvebirinê nirxand û got: "Niha em li Deşta Nînovayê li ser herêmeke serbixwe dixebitin. Em naxwazin ku xwe ji Iraqê qut bikin, lê me divê xweseriya Şengalê hebe û em girêdayî rêveberiya navendî bin. Ya muhîm herkes heqê xwe bibe."