Çalakiya nobetê ya li ser sînorê Qamişloyê ya li dijî êrîşên li ser Bakur û Rojhilatê Sûriyeyê hatiye destpêkirin di roja 7’an de ye. Di çalakiyê de berxwedana Rojava hate silavkirin û banga yekîtiyê hate kirin.
Nobeta ku li ser sînorê Qamişlo û Nisêbînê ya li dijî êrîşên dagirkeriyê yên dewleta Tirk û çeteyên SMO yên li dijî Bakur û Rojhilatê Sûriyeyê di roja 7’an de didome. Bi sedan welatî ji bo bidawîkirina êrîşan û qebûlkirina statuya Rêveberiya Xweser a Bakur û Rojhilatê Sûriyeyê ji saetên serê sibê ve hatin qadê, dirûşmên "Bijî berxwedana Rojava" berzkirin. Gel li qada nobetê bê navber dirûşme berz kirin û sirûdên berxwedanê gotin. Bi dehan hunermendên ji Mêrdîn, Amed, Êlih, Wan û navçeyên derdorê jî piştgirî dan çalakiyê.
Hunermendên ku bi erbaneyan û sirûda Herne Pêş ketin qadê, ji aliyê gel ve bi coş hatin pêşwazîkirin.
Şandeya Çewlîg û Xarpetê bi pêşmalkên "Bijî berxwedana Rojava" û "Ji şer re na" li xwe kiribûn ketin qadê.
‘DESTKETIYÊN KURDAN HEDEF DIGIRIN’
Hevserokê DEM Partî yê Çewlîgê Huseyîn Yoldaş diyar kir ku armanca bingehîn a êrîşên li ser Rojava tinekirina destkeftiyên Kurdan e û got, "Em bi salan e li dijî faşîzmê têdikoşin. Dixwazin destkeftiyên Kurdan tine bikin. Em ji Şêx Saîd û vir ve şer dikin, ji Seyîd Riza heta niha li ber xwe didin: Em ji vir bang dikin û dibêjin: Werin destê aştiyê bigirin. Em bang li gelê Başûrê Kurdistanê jî dikin ku destê xwe bidin xwîşk û birayên xwe û em bi hev re van destkeftiyan biparêzin."
Hevserokê DEM Partî yê Xarpêtê Alî Yildirim diyar kir ku ew ji bo aştiyê hatine gel hev û got, "Em dixwazin siberoja van xakên qedîm bi aştiyê ava bikin. Her kesên ku aştiyê diparêzin divê li dijî êrîşan derkevin.”
BANGA HUNERMENDAN: XWEDÎ LI ŞOREŞA ROJAVA DERKEVIN
Li ser navê hunermendên MKM’ê Cesîm Başboga jî axivî û diyar kir ku ew ê li dijî êrîşên li ser Rojava bisekinin û wiha got: “Em dibêjin; kîjan hêz çi dibe bila bibe, em ê li dijî kesên ku êrîşî ser zimanê me, çanda me dikin rawestin. Werin em xwedî li Rojava derkevin û piştgiriyê bidin gelê Rojava.”
‘HETA KU STATUYA ROJAVA BÊ NASKIRIN EM Ê LI VIR BIN’
Parlamentera Mêrdînê Bêrîtan Guneş Altin diyar kir ku dema li Kobanê şer destpê kir gelê Kurd li her derê li ber xwe da û got, "Heta ku em statuya Rojava bi dest bixin em ê li vir, li ser sînor bin. Desthilatdar dibêje ti pirsgirêka wan bi Kurdan re nîne, çima hûn naxwazin Kurd bibin xwedî statu û jiyaneke nû ava bikin. Em ê careke din nahêlin Kurd di nava tarîtiya DAÎŞ'ê de bên hiştin.”
Bêrîtan Guneş Altin axaftina xwe wiha domand: ”Ji ber ku birêz Ocalan dibêje ku li vir rastiyek heye, rastiya van axan vedibêje, tê tecrîdkirin."
Çalakiya nobetê wê sibe jî dewam bike.
