Welat di jiyana xwe ya şoreşgerî de gotina 'Me bi ciwantî destpê kir, em ê bi ciwantî bi ser bikevin' a Rêber Apo ji xwe re kir esas û heta şehadetê di vê rêyê de meşiya. Mîna Alî Çîçek sekneke asî nîşan da û bû sembola ciwantiya dema xwe.

Kurdistan ku bi Peymana Lozanê re di 24'ê Tîrmeha 1923'an ji aliyê dagirkeran ve hate parçekirin wê vê qederê qebûl bike? Yan jî ev peyamana li ser kaxizê bi çend nameyan wê Kurdistanê bi çar parçeyan ji hev cuda bike? Kurdistan di nava çar dewletan de bi zorê parçe kiribin jî nekarîn xakê cuda bike, gel cuda bike, çandê cuda bike. Ji ber ku rêze çiyayên Zagrosê yên ku Kurdistanê digihînin hev, têrê dike ku ji dagirkeran re bibêje 'Hûn nikarin min parçe bikin'. Mirovên li heman xak û û çandê wê bibêjin ku ti carî nikarin yekîtî û hevgirtina wan tine bikin. Ji ber vê yekê jî li her devera Kurdistanê têkoşîn, berxwedan û şerekî bêhempa hate kirin. Xelkê Rojhilat jî di vê têkoşînê de berdêlên giran da. Ti carî dest ji berxwedana xwe berneda. Bi rabûna Rêbertî re hêviya wan nû bû û li gel zarokên xwe di nava têkoşîna azadiyê de cih girt.

Poriya Îrfanî li bajarê qedîm ê Rojhilatê Kurdistanê li Kirmaşanê li nava malbateke welatparêz ji dayik bû. Ji ber ku malbata wî azadî di nava PKK'ê de didît û welatparêz bû, hîn biçûkanî Tevgera Azadiyê ya Kurd nas kir. Poriya Îrfanî ku haya wî ji zilma dewleta Îranê ya li ser Kurdan hebû, di zarokatiya xwe de çîroka Kawayê Hesinkar û Dehaq ê zalim ji dayika xwe guhdarî kir. Ji ber zext û zilma li gelê Kurd dikir jî rejîma Îranê weke Dehaqê demê didît. Poriya Îrfanî dema ku diçû dibistana dewletê, dît ku rejîm ciwanan dike sîxur û hêrsa wî ya li hemberî vê rejîmê mezin bû. Kete nava lêgerînê û tevlîbûna kekê wî li nava refên gerîla gelekî bandor lê kir. Wî jî ji xwe re kir armanc ku tevlî nava refên gerîla bibe.

BI TEMAMÎ XWE TEVLÎ NAVA TÊKOŞÎNÊ KIR

Poriya li ser tevlîbûna kekê wî li nava Tevgera Azadiyê ya Kurd gotibû, "Kekê mi ti carî qebûl nekir ku Kurdistan di bin dagirkeriyê de bimîne, ji ber vê yekê ev rê da ber xwe. Lewma ez jî di wê baweriyê de me ku rêya herî rast û baş jî rêya wî ye. Ev yek jî tê wê wateyê ku jiyana herî durust û azad di nava PKK'ê de ye."

Poriya Îrfanî demeke kurt piştî tevlîbûna kekê wî di sala 2016'an de berê xwe da çiyayên Kurdistanê û tevlî nava refên gerîla bû. Ji ber ku ji zarokatiya xwe ve evîndarê welatê xwe bû navê xwe kir Welat Dalaho. Bi enerjiya ciwantiyê li her qada lê dima tevlî nava jiyanê, perwerdeyê û kar bû. Welat bi her awayî xwe tevlî nava têkoşînê kir, di her kêliyê de ji bo têkoşînê mezin bike hewl da. Ji bo vê jî bê rawestandin xwe perwerde kir û bi pêş ve bir. Weke gerîlayekî ciwan ji bo karibe li dijî dijmin têkoşîneke çalak bimeşîne ji aliyê leşkerî ve jî xwe kûr kir û bû sekvanekî çalak.

Welat ku li nava refên gerîla herî zêde têkiliyên hevrêtiyê bandor lê kir, bi heman rengî bi hurmet û hezkirin nêzî hevrêyên xwe bû. Gerîla Welat li gelek qadên cuda xebitî û li dijî êrîşên dewleta Tirk a dagirker ên li ser Herêmên Parastinê yên Medyayê xwest tevlî berxwedanê bibe. Ji bo vê jî di sala 2022'an de bi coş û moraleke mezin derbasî Herêmên Parastinê yên Medyayê bû. Bi heman enerjiya ciwantiyê pêvajoyeke nû da destpêkirin.

Ji bo hevrêyên wî jî di taktîk û çekên demê de bibin pispor bi şev û roj ders dida wan. Ewqasî dilsozê çeka xwe bû mîna parçeyek ji canê xwe didît. Bêguman li cihê hezkirin hebe serketin jî heye. Heval Welat bi vê hezkirin û sekna xwe ya leşkerî da ser şopa şehîd Simko Serhildan. Piştî ku şer li herêmê mezin bû, Welat israr kir ku tevlî berxwedanê bibe û xwest soza azadiyê ya ku dabû Kurdistanê bi cih bîne. Ji ber vê jî got, "Min soz da, partiya me jî dixwaze em bi rengekî fedaî tevlî vê pêvajoyê bibin. Ji ber vê yekê soza xwe dubare dikim; ez amade me bi rengekî fedaî tevlî bibim." Li ser vê bingehê tevlî nava tîmên bi tevger bû û berê xwe da Qada Berxwedanê ya Girê Amediyê.

BÛ MILÎTANEKÎ PÊŞENG Ê BERXWEDANA GIRÊ AMEDIYÊ

Welat ku bi fedakarî tevlî nava tîmên bi tevger bû, baş zanîbû ku li dijî êrîşên dewleta Tirk çawa bikeve çeperê û xwe biparêze. Êdî ne tenê xwe diparast, her wiha bi çalakiyên xurt derbên gelekî giran li dijmin xist. Dema ku pêwîstî pê hebû sûîqest dikir, li gorî pêwîstiyan jî derbasî nava çeperan dibû û çalakî dikir. Li gel agirê tolhildanê yê di dilê xwe de bi xwînsarî û wêrekiya xwe hêz da hevalên xwe.

Li Girê Amediyê ku dewleta Tirk li gel teknîk û çekên kîmyewî jî nekarî berxwedana wê bişikîne, hevalê Welat li gel hevrêya xwe Nîrvana bi çalakiyan derbên xurt li dijmin xist. Ji sûîqestê heta sabotajê û teknîka serdegirtina dijmin, Welat Dalaho pêşengî ji gelek çalakiyên afirîner re kir, bi vî rengî soza xwe yek bi yek bi cih anî. Welat ku milîtanê pêşeng ê berxwedana Girê Amediyê bû 22'ê Tebaxa 2022'an li dijî leşkerên dijmin tevlî şer bû. Di şer de ku bi dehan leşkerên dijmin hatin kuştin tevî hevrêya xwe Nîrvana heta nefesa xwe ya dawî şer kir û tevlî karwanê şehîdan bû. Li Kurdsitanê heta ku lehengên mîna hevalê Welat hebin wê bahoza tolhildanê nesekine.