Meclîsa Civaka navçeya Borik a Şengalê 2. Konferansa xwe lidar xist. Di destpêka Konferansê de Hevserokê Meclîsa Xweser a Şengalê Hisen Hacî axivî û xwest, konferans bibe wesîleya tifaq û hevgirtina civaka Êzidî.

Hacî got; "Divê em wek civaka Êzidî bibin tifaq. Dema ev pêkhat wê karê me ji xurtir bibe." Hacî herî dawî bal kişand ser hilbijartinên parlamenta Iraqê û got; "Divê civaka Êzidî dengê xwe bide yên xizmeta civaka Êzidî bikin."

Hevserokê Meclîsa Demokratîk Riham Hîco piştre axivî û got, "Ev konferans ji bo me pir girîng û bi wate ye. Tevî zorî û zehmetiyan jî meclîsê karê xwe kir."

Hîco jî işaret bi hilbijartinên parlamenta Iraqê kir û got, "Cara yekem e ku partiya me tevlî hilbijartinan dibe. Ji ber vê yekê, serketina di hilbijartinan de wê serketina me hemûyan be."

Bi navê PADÊ Emer Salih û li ser navê TAJÊ Nam Hesen axivîn. Qisekeran ji civaka Êzidî xwestin ku di hilbijartinê de dengê xwe bidin îradeya xwe.

Piştî axaftinan di konferansê de Faysel Reşîd û Meyan Xwedêda wek hevserok hatin hilbijartin. Herwiha komîteyên çand û hûner, dad, perwerde, aborî û ciwanan jî hatin hilbijartin.