Li Gundê Sêy yê Binarê Qendîlê  bi beşdarbûna sedan kesên navçe û bajarên derdor yên Başûrê Kurdistanê bi dirûşmeya “Her der berxwedan, her der serhildan” 41’emîn salvegera damezrandina Partiya Karkerên Kurdistan (PKK) hate pîroz kirin.

Pîrozbahî saet 13:00’a destpê kir û heta saet 16:00’an dom kir. Pîrozbahî ji bo bîranîna şehîdên têkoşîna azadiyê bi deqîqeyek rêzgirtinê destpê kir. Piştre Rênas Aryan peyama pîrozbahiyê ya Rêveberiya KOmîteya PKK’ê xwend.

Di peyamê salvegara PKK'ê li Rêberê Gelê Kurd Abdullah OcalanAbdullah Ocalan, tevahiya gelê Kurd û dostên wan hate pîrozkirin. Herwiha hemû şehîdên Kurdistanê tên bibîranin û wiha tê gotin; "Em soz didin ku armanca wan bigihînin serkeftinê.

PKK di 22 salên dawîn de li hemberî êrîşên dagirker ên navneteweyî û pergala qirkirinê ya Îmraliyê berxwedana şoreşgerî bi rê ve dibe. Li ser vî esasî komploya navneteweyî ya ku DYE birêxistin kiriye, ji binî ve parçe kiriye û hemû rûpoşên Komara Tirk xistiye erdê, di şexsê dîktatoriya faşîst a AKP û MHP’ê rastiya dijmin a qirker û mêtinger derxistiye holê û ev feraset aniye ber têkçûnê.

Pêşengê azadiya gelê Kurd PKK, di salvegera xwe ya 41’emîn a fermî de ye. Em dikevin sala 42’emîn a PKK’ê. Li her qadê nîqaşên kûr û pîrozbahiyên bi coş tê kirin. Li ser vî esasî ya Rêber Apo di serî de, em Cejna Partiyê ya hemû rêheval, gel û dostên xwe yên şoreşger û demokratîk pîroz dikin û di têkoşîna wa de serkeftinê ji wan re dixwazin. Em nêzî 40 hezar şehîdên xwe bi rêz û hurmet bi bîr tînin û em soza xwe dubare dikin ku em ê armanca wan bi ser bixînin û em ê wan bidin jiyîn.

Wekî ku tê zanîn PKK dibe partiyeke Rêbertî û şehîdane. Ji serî ve bi felsefeya azadiyê ya Rêber Abdullah Ocalan xwe ava kiriye, fikr û taybetiyên wî yên kesayetiyê ji xwe re kiriye mînak, pîvanên îdeolojîk û tarza wî wergirtiye û bûye berhema ked û hewldana ku qet naqede. Rêber Apo diyar dike ku ‘Şehîd PKK’yî ne’ û balê dibe ser vî tiştî ku şehîdên me yên qehreman wekî PKK dijîn.

'PKK WÊ JI BO YEKÎTIYA KURDAN BI ERKA XWE RABE'

Di berdewama peyamê de wiha tê gotin; "PKK di sala 42’yemîn de ji bo geşkirina berxwedana azadiyê û avakirina yekîtiya demokratîk a Kurdan, careke din diyar dike ku wê hemû peywirên dikeve ser milê wê, pêk bîne. Li ser vî esasî em bang li hemû partî û rêxistinên Kurdan, hunermend, ronakbîr, jin û ciwanên Kurd dikin ku bila derfetan bibînin, li ser esasê Kongreya Neteweyî tifaq û yekîtiya xwe ava bikin û ji bo azadiyê bi hev re bixebitin.

Sala 42’emîn a PKK’ê wê bibe sala ku feraseta faşîst, mêtinger û mêrserwer were hilweşandin, têkoşîna azadî û demokrasiyê ya li ser xeta azadiya jinan were geşkirin. Têkoşîna azadiya Kurdistanê ya bi xeta azadî û têkoşîna Apoyî xwe ava kiriye, wê bêtir pêşengiyê ji têkoşîneke wisa re bike.

Li ser vî esasî em careke din sala 42’emîn a PKK’ê silav dikin, Cejna Partiyê û Vejîna Neteweyî ya hemû kesan pîroz dikin. Em bang li hemû rêheval, jin, ciwan û gel û dostên xwe dikin ku di sala 42’emîn a PKK’ê de em li hemberî siyaseta faşîst û mêtinger, têkoşîna xwe ya azadî û demokrasiyê geştir bikin.”

Piştre li ser navê Komîteya Şehîdên PKK'ê ya Başûrê Kurdistanê Hadî Omer axivî û got;"Vê roja pîroz li Rêber Apo, şehîdan û tevahiya azadîxwazan pîroz dikin. Ev fikir û felsefe îro Kurdistan û Rojhilata Navîn belav bûye. Bûye sedemek gelên Rojhilata Navîn li ser piyê xwe rawestin û sîstema Xwerêveberiya Demokratîk pêk bînin. Bûye havênê aştî û jiyana bi hev re ya gelan."

Herwiha Koma Şehîd Serhed û Hunermend Şemamî derketin ser dikê û bi govendê şahiyê heta saet 16.00'an berdewam kir.